Heavy Rain resque Video Dungra Police Station: વલસાડ જિલ્લાના વાપી (Vapi)માં ભારે વરસાદ બાદ સર્જાયેલી પૂર જેવી સ્થિતિ વચ્ચે માનવતાનું અનોખું ઉદાહરણ સામે આવ્યું છે. મોરાઈ ગામ (Morai Village) નજીક કોલક નદી (Kolak River)ના ધસમસતા પ્રવાહમાં ફસાયેલા એક યુવકને બચાવવા માટે ડુંગરા પોલીસ સ્ટેશન (Dungra Police Station)ના પોલીસ ઇન્સ્પેક્ટર (Police Inspector – PI) બી. એન. ગોહિલ (B.N. Gohil) પોતાના જીવની ચિંતા કર્યા વગર વીજળીના થાંભલા પર ચઢી ગયા હતા. આ સમગ્ર ઘટનાનો વીડિયો સોશિયલ મીડિયા પર વાયરલ થયો છે.
22 જુલાઈની રાત્રે વાપીમાં ભારે વરસાદને કારણે કોલક નદીએ રૌદ્ર સ્વરૂપ ધારણ કર્યું હતું. મોરાઈ ગામની સીમમાં સિક્યોરિટી ગાર્ડ તરીકે કામ કરતા મકસુદન યાદવ (Maqsudan Yadav) પાણીના પ્રવાહમાં ફસાઈ ગયા હતા. બચવાનો કોઈ રસ્તો ન દેખાતા તેમણે વીજળીના થાંભલાનો સહારો લીધો અને કલાકો સુધી ત્યાં જ જીવ બચાવવા ઉભા રહ્યા.
મકસુદન યાદવે જણાવ્યું કે રાત્રે લગભગ ત્રણ વાગ્યે ઊંઘમાંથી જાગ્યા ત્યારે ચારે તરફ પાણી ભરાઈ ગયું હતું. થોડા જ સમયમાં પાણી ગળા સુધી આવી પહોંચ્યું. તેમણે પહેલાં ઝાડનો સહારો લીધો, પરંતુ સ્થિતિ વધુ જોખમી બનતા અંતે વીજળીના થાંભલાને પકડી રાખ્યો. તેઓ સતત ભગવાનનું સ્મરણ કરતા રહ્યા અને લગભગ 15થી 16 કલાક સુધી થાંભલાના સહારે ટકી રહ્યા.
આ ઘટનાની જાણ થતાં પોલીસ સ્થળ પર પહોંચી હતી. પરંતુ પાણીનો પ્રવાહ એટલો પ્રચંડ હતો કે સ્થાનિક તરવૈયાઓ, લાઇફ જેકેટ અને દોરડાની મદદથી કરાયેલા અનેક પ્રયાસો પણ નિષ્ફળ રહ્યા. ત્યારબાદ ડિઝાસ્ટર કંટ્રોલ (Disaster Control), જિલ્લા વહીવટીતંત્ર અને સ્ટેટ ડિઝાસ્ટર રિસ્પોન્સ ફોર્સ (State Disaster Response Force – SDRF)ને પણ જાણ કરવામાં આવી હતી.
પરિસ્થિતિ વધુ ગંભીર બનતાં PI બી. એન. ગોહિલે વીજ પુરવઠો બંધ કરાવ્યા બાદ મંકી ક્લાઇમ્બિંગ (Monkey Climbing) પદ્ધતિથી વીજળીના થાંભલા પર ચઢીને ફસાયેલા વ્યક્તિ સુધી પહોંચવાનો પ્રયાસ કર્યો. તેમણે જણાવ્યું કે તે સમયે મનમાં માત્ર એક જ વિચાર હતો કે ગમે તે રીતે ફસાયેલા વ્યક્તિનો જીવ બચાવવો. સાથે જ તેમને એ વાતનો ડર પણ હતો કે ક્યાંક વીજ પુરવઠો ફરી શરૂ ન થઈ જાય.
વલસાડના ડીવાયએસપી (Deputy Superintendent of Police – DySP) બી. એન. દવેએ જણાવ્યું કે પોલીસ માટે સૌથી મોટી ચિંતા એક વ્યક્તિને બચાવતાં બીજી કોઈ જાનહાનિ ન થાય તેની હતી. તમામ સુરક્ષા વ્યવસ્થાઓ વચ્ચે PI ગોહિલનો આત્મવિશ્વાસ જ રેસ્ક્યૂ ઓપરેશનની સૌથી મોટી તાકાત બન્યો હતો.
અંતે કોસ્ટ ગાર્ડ (Coast Guard) અને હેલિકોપ્ટરની મદદથી મકસુદન યાદવને સુરક્ષિત રીતે બહાર કાઢવામાં આવ્યા હતા. સફળ રેસ્ક્યૂ બાદ PI ગોહિલ થાંભલા પરથી નીચે ઉતરતાં જ પોલીસ અધિકારીઓ અને જવાનો તેમને ભેટી પડ્યા હતા.
મકસુદન યાદવે જણાવ્યું કે ગુજરાત પોલીસ (Gujarat Police)એ તેમનો જીવ બચાવ્યો છે અને તેઓ પોલીસના આ ઉપકારને ક્યારેય ભૂલી શકશે નહીં.
 |  |  |  |
