નવજીવન ન્યૂઝ. પટનાઃ બિહારના રાજકારણમાંથી મોટા સમાચાર સામે આવી રહ્યા છે. કહેવામાં આવી રહ્યું છે કે કાયદા મંત્રી કાર્તિકેય સિંહ બાદ હવે નીતીશ સરકારમાં કૃષિ મંત્રી બનનારા અને આરજેડી નેતા સુધાકર સિંહે પણ મંત્રી પદ પરથી રાજીનામું આપી દીધું છે. તેમણે પોતાનું રાજીનામું ડેપ્યુટી સીએમ તેજસ્વી યાદવને સોંપી દીધું છે. જો કે હજુ સુધી રાજીનામું સ્વીકારવામાં આવ્યું નથી. આ વાતની પુષ્ટિ આરજેડીના પ્રદેશ અધ્યક્ષ અને સુધાકર સિંહના પિતા જગદાનંદ સિંહે પણ કરી છે. જગદાનંદ સિંહે કહ્યું કે કૃષિ મંત્રી ખેડૂતોના પક્ષમાં અવાજ ઉઠાવી રહ્યા હતા પરંતુ અંતે તેમણે રાજીનામું આપવાનું નક્કી કર્યું જેથી લડત આગળ ન વધે.
બિહારના કૃષિ મંત્રી સુધાકર સિંહ તાજેતરમાં જ પોતાના જ વિભાગમાં ભ્રષ્ટાચારનો મુદ્દો ઉઠાવીને ખૂબ ચર્ચામાં આવ્યા હતા. આરજેડી નેતાએ ત્યારે વિવાદ ઉભો કર્યો જ્યારે તેમણે નિવેદન આપ્યું કે તેમના વિભાગના તમામ અધિકારીઓ ચોર છે અને આ વિભાગના વડા હોવાને કારણે તેઓ ચોરોના વડા છે. કૃષિ મંત્રી સુધાકર સિંહે કહ્યું હતું કે આપણાથી પણ ઉપર બીજા ઘણા સરદારો છે. સુધાકર સિંહ કૈમુર જિલ્લાના રામગઢથી પહેલીવાર ધારાસભ્ય બન્યા છે.
સુધાકર સિંહ વર્તમાન આરજેડી પ્રદેશ અધ્યક્ષ જગદાનંદ સિંહના પુત્ર છે અને હાલમાં કૈમુરના રામગઢથી ધારાસભ્ય છે. સુધાકર સિંહે તેમના પિતા સામે બળવો કરીને 2010માં ભાજપની ટિકિટ પર ચૂંટણી મેદાનમાં ઉતર્યા હતા, પરંતુ તેઓ ચૂંટણી હારી ગયા હતા. સુધાકર સિંહની શૈક્ષણિક લાયકાત ગ્રેજ્યુએટ છે અને તેમની ઉંમર 44 વર્ષ છે. સુધાકર સિંહ રાજકારણમાં આવતા પહેલા ખેતીનું કામ કરતા હતા.
સુધાકર સિંહ પર ચોખા કૌભાંડનો આરોપ છે. આ ચોખા કૌભાંડ 2013-14માં થયું હતું. તેમના પર ચોખા જમા ન કરવાનો અને તેની ઉચાપત કરવાનો આરોપ હતો. આ મામલો હજુ જ્યુડિશિયલ મેજિસ્ટ્રેટની પ્રથમ કોર્ટમાં પેન્ડિંગ છે. તેની સામે રામગઢ પોલીસ સ્ટેશનમાં જ કેસ થયો હતો. લાલુ યાદવના પરિવાર સાથે તેમના પિતાની નિકટતા કામ કરી ગઈ અને તેમને મંત્રી પદ મળ્યું.
 |  |  |  |
