- અરવલ્લીમાં બની રહ્યું છે સ્પોર્ટ્સ સંકુલ, પણ હોકી માટે એસ્ટ્રો ટર્ફ અંગે અસમંજસ.
- સામાન્ય મેદાન પર પ્રેક્ટિસ કરીને ખેલાડીઓ પહોંચ્યા નેશનલ લેવલે.
- ગુજરાતમાં ગણતરીના જ એસ્ટ્રો ટર્ફ મેદાન, ઉત્તર ગુજરાતમાં સુવિધાની તાતી જરૂરિયાત.
જય અમિન (નવજીવન ન્યૂઝ.અરવલ્લી):
અરવલ્લી જિલ્લો શિક્ષણ અને રમતગમત ક્ષેત્રે હંમેશા મોખરે રહ્યો છે. અહીંના હોકી ખેલાડીઓએ સાબિત કરી દીધું છે કે જો ઈરાદા મજબૂત હોય તો સાધનોનો અભાવ નડતો નથી. પરંતુ, હવે સવાલ એ છે કે શું તંત્ર આ પ્રતિભાને ન્યાય આપશે?
સંઘર્ષ અને સફળતા:
આજના આધુનિક સમયમાં હોકી ‘એસ્ટ્રો ટર્ફ’ (કૃત્રિમ ઘાસવાળા મેદાન) પર રમાય છે, છતાં અરવલ્લીના ખેલાડીઓ ધૂળિયા મેદાન પર પરસેવો પાડીને રાષ્ટ્રીય કક્ષાએ મેડલ લાવી રહ્યા છે. આ તેમની મહેનત છે, પણ ક્યાંક ને ક્યાંક સુવિધાનો અભાવ તેમને ઉચ્ચ સ્તરે પહોંચતા અટકાવી શકે છે.
સ્પોર્ટ્સ સંકુલ અને નવી આશા:
જિલ્લામાં હાલ સ્પોર્ટ્સ સંકુલનું નિર્માણ કાર્ય પૂરજોશમાં છે. રમતગમત પ્રેમીઓમાં આનંદ છે, પરંતુ સાથે એક ચિંતા પણ છે. જો આ સંકુલમાં આધુનિક હોકી માટેનું એસ્ટ્રો ટર્ફ નહીં હોય, તો આ નવી સુવિધાઓ હોકી ખેલાડીઓ માટે અધૂરી ગણાશે.
કેમ જરૂરી છે એસ્ટ્રો ટર્ફ?
રાજ્યમાં હાલ દેવગઢ બારિયા, દક્ષિણ ગુજરાત યુનિવર્સિટી અને સૌરાષ્ટ્ર યુનિવર્સિટી જેવા ગણ્યાગાંઠ્યા સ્થળોએ જ આ સુવિધા ઉપલબ્ધ છે. સ્ટેટ અને નેશનલ લેવલની તમામ મેચો હવે ટર્ફ પર રમાતી હોવાથી, જો અરવલ્લીના ખેલાડીઓને ઘરઆંગણે આ સુવિધા મળે તો તેઓ આંતરરાષ્ટ્રીય સ્તરે પણ ડંકો વગાડી શકે તેમ છે.
 |  |  |  |
