નવજીવન ન્યૂઝ નેટવર્ક.નવી દિલ્હીઃ પશ્ચિમ બંગાળ વિધાનસભા ચૂંટણી 2026માં ભારતીય જનતા પાર્ટીએ ઐતિહાસિક જીત નોંધાવી છે. પાર્ટીએ 206 બેઠકો જીતતા તૃણમૂલ કોંગ્રેસના 15 વર્ષના શાસનનો અંત લાવ્યો છે. 2021માં 215 બેઠકો જીતનારી TMC આ વખતે માત્ર 81 બેઠકો પર સીમિત રહી છે, જ્યારે ભાજપે અગાઉની 77 બેઠકોની સરખામણીએ ઢાઈ ગણો વધારો કર્યો છે.
ચૂંટણી હાર છતાં મમતા બેનર્જીએ તીખા વલણ સાથે સ્પષ્ટ સંકેત આપ્યો છે કે તેઓ આ રાજકીય લડાઈ આગળ વધારશે. મમતાએ ભાજપ પર ચૂંટણી આયોગ સાથે સઠગાંઠ કરીને લગભગ 100 બેઠકોમાં મતલૂંટ કરવાનો આરોપ લગાવ્યો છે અને કાનૂની તથા રાજકીય લડત લડવાની તૈયારી દર્શાવી છે. તેઓ અભિષેક બેનર્જી સાથે પ્રેસ કોન્ફરન્સ પણ યોજશે.
1998માં કોંગ્રેસથી અલગ થઈને બનેલી તૃણમૂલ કોંગ્રેસ આજે ફરી એક મોટા રાજકીય મુકામે આવી પહોંચી છે. નંદીગ્રામ અને સિંગૂર જેવી ચળવળોથી ઉદ્ભવેલી પાર્ટી હવે નવા પડકારોનો સામનો કરી રહી છે. વિશ્લેષકોના મતે, સત્તા બદલાઈ હોવા છતાં રાજકીય હિંસા અને સિન્ડિકેટ રાજ જેવા મુદ્દાઓ યથાવત રહેતા TMCને નુકસાન થયું છે.
આંકડાઓ મુજબ ભાજપને આશરે 45% અને TMCને 40% જેટલા મત મળ્યા છે, જે દર્શાવે છે કે પાર્ટીનો કોર વોટબેંક હજુ અડગ છે. છતાં, મહિલાઓ અને મુસ્લિમ મતદારોમાં ઘટાડો અને વિરોધી લહેરના કારણે TMCને મોટું નુકસાન થયું છે.
ભાજપે આ ચૂંટણીમાં ભ્રષ્ટાચાર, સિન્ડિકેટ રાજ અને માફિયારાજ જેવા મુદ્દાઓને મુખ્ય એજન્ડા બનાવ્યો હતો, જેના કારણે શહેરી અને મધ્યવર્ગીય મતદારો ભાજપ તરફ વળ્યા છે.
આગામી સમયમાં TMCમાં મોટા સંગઠનાત્મક ફેરફારો જોવા મળી શકે છે. મમતાબેનર્જી બાદ તેમના ભત્રીજા અભિષેક બેનર્જીને પાર્ટીના ભવિષ્યના નેતા તરીકે આગળ લાવવાની ચર્ચા તેજ થઈ છે. તેઓ પહેલાથી જ પાર્ટીની યુવા શાખાના પ્રમુખ અને સાંસદ તરીકે સક્રિય છે.
હવે TMC સામે સૌથી મોટો પડકાર પોતાના ધારાસભ્યો અને કાર્યકરોને એકજૂટ રાખવાનો રહેશે. સાથે જ ISF, AJUP અને AIMIM વચ્ચે મુસ્લિમ મતબેંકના વિખંડનને ફરીથી એકત્રિત કરવું પણ જરૂરી બનશે.
કેન્દ્રિય તપાસ એજન્સીઓ (ED અને CBI)ના કેસો પણ પાર્ટી માટે પડકારરૂપ બની શકે છે. હવે TMC માટે આ એક અસ્તિત્વની લડાઈ બની ગઈ છે, જ્યાં મમતાબેનર્જી માર્ગદર્શક બની શકે છે અને અભિષેક બેનર્જી સંગઠન સંભાળે તેવી શક્યતા છે.
 |  |  |  |
