નવજીવન ન્યૂઝ.પેરિસઃ રશિયન પ્રમુખ વ્લાદિમીર પુતિને યુક્રેન પર હુમલો કરવાનો આદેશ આપ્યો હોવાના યુએસ ગુપ્તચર એજન્સીઓના દાવા વચ્ચે યુદ્ધ ટાળવાના પ્રયાસો વધુ તીવ્ર બન્યા છે. રાષ્ટ્રપતિ જો બિડેને ફ્રાન્સના રાષ્ટ્રપતિ ઈમેન્યુઅલ મેક્રોન સાથે ફોન પર વાત કરી હતી. મેક્રોનના કાર્યાલયે ત્યારબાદ કહ્યું કે યુક્રેન કટોકટી પર બેઠક યોજવા રાષ્ટ્રપતિ પુતિન અને રાષ્ટ્રપતિ બિડેન વચ્ચે શરતી “સૈદ્ધાંતિક કરાર” થયો છે.
સોમવારે સવારે ફ્રાન્સના રાષ્ટ્રપતિ મેક્રોનના કાર્યાલયે એક નિવેદન જાહેર કરીને આ વાત કહી. નિવેદનમાં કહેવામાં આવ્યું છે કે જો રશિયા પાડોશી દેશ યુક્રેન પર હુમલો નહીં કરે તો જ સમિટ થશે. મેક્રોને બંને નેતાઓને યુરોપમાં સુરક્ષા અને વ્યૂહાત્મક સ્થિરતા પર સમિટ યોજવાનો પ્રસ્તાવ મૂક્યો હતો એમ નિવેદનમાં જણાવાયું છે. રાષ્ટ્રપતિ બિડેન અને પુતિન બંનેએ તેનો સૈદ્ધાંતિક સ્વીકાર કર્યો છે.
નિવેદનમાં કહેવામાં આવ્યું છે કે જો રશિયા યુક્રેન પર હુમલો કરે તો આવી બેઠક અશક્ય હશે કારણ કે પશ્ચિમી દેશોને ડર છે કે રશિયા હુમલાની યોજના બનાવી રહ્યું છે. જોકે, ફ્રાંસના રાષ્ટ્રપતિના કાર્યાલયના આ નિવેદન પર વ્હાઇટ હાઉસ તરફથી કોઈ પ્રતિક્રિયા આવી નથી.
આ પહેલા રવિવારે બિડેન અને મેક્રોન વચ્ચેની વાતચીતમાં યુક્રેનની સરહદ નજીક રશિયન દળોને એકત્ર કરવા અને ઉગ્રતા અને મુકાબલો ટાળવા માટે ચાલી રહેલા રાજદ્વારી પ્રયાસો અંગે ચર્ચા કરવામાં આવી હતી. આ પહેલા 6 ફેબ્રુઆરીએ અમેરિકા અને ફ્રાન્સના રાષ્ટ્રપતિઓએ આ મામલે વાત કરી હતી. 6 ફેબ્રુઆરીની મંત્રણા પછી, બિડેન અને મેક્રોને જણાવ્યું હતું કે તેઓ યુક્રેનની સાર્વભૌમત્વ અને અખંડિતતા જાળવવામાં મદદ કરવા માટે પ્રતિબદ્ધ છે.
બિડેને યુક્રેનની આસપાસની સ્થિતિને લઈને રવિવારે યુએસ નેશનલ સિક્યુરિટી કાઉન્સિલની બેઠક પણ યોજી હતી. આ બેઠકમાં અમેરિકાના વિદેશ સચિવ એન્ટની બ્લિંકન, સંરક્ષણ સચિવ લોયડ ઓસ્ટિન અને NSCના અન્ય સભ્યો હાજર હતા.
બીજી તરફ, મોસ્કોમાં ક્રેમલિને રવિવારે એક નિવેદન જારી કરીને જણાવ્યું હતું કે મેક્રોન અને રશિયન પ્રમુખ પુતિને યુક્રેનની આસપાસના વિકાસ તેમજ રશિયા માટે લાંબા ગાળાના કાયદાકીય રક્ષણની બાંયધરી અંગે ઊંડાણપૂર્વક ચર્ચા કરી હતી.
આ દરમિયાન અમેરિકી ગુપ્તચર સૂત્રોએ દાવો કર્યો છે કે રશિયન ટેન્કોએ યુક્રેન તરફ આગળ વધવાનું શરૂ કરી દીધું છે. આ સૂત્રોના જણાવ્યા અનુસાર, રશિયન રાષ્ટ્રપતિ વ્લાદિમીર પુતિને રશિયન દળોને યુક્રેન પર હુમલો કરવાનો આદેશ આપ્યો છે અને હવે હુમલાની અંતિમ યોજના ચાલી રહી છે. આ યોજના હેઠળ રશિયા મિસાઈલ અને હવાઈ હુમલા પહેલા સાયબર હુમલાથી શરૂઆત કરશે અને અંતે ગ્રાઉન્ડ ફોર્સ યુક્રેનના શહેરોને કબજે કરશે. રશિયન ફ્રન્ટલાઈન આર્મી વાહનો, ટેન્ક પર Z અક્ષરો દોરવામાં આવ્યા છે અને આ ટેન્ક યુક્રેન સરહદ તરફ આગળ વધતી જોવા મળે છે.
મેક્રોને રવિવારે પુતિન સાથે બે ટેલિફોનિક વાતચીત કર્યા પછી યુક્રેનની પરિસ્થિતિ વિશે બિડેનનો સંપર્ક કર્યા હતો ત્યાર બાદ આ કરાર થયો હતો. એલિસી દ્વારા રવિવારે જાહેર કરાયેલા એક નિવેદનમાં કહેવામાં આવ્યું છે કે “રાષ્ટ્રપતિ મેક્રોને રાષ્ટ્રપતિ બિડેન અને રાષ્ટ્રપતિ પુટિન વચ્ચે સમિટનો પ્રસ્તાવ મૂક્યો હતો, અને પછી તમામ ભાગીદારો સાથે, યુરોપની સુરક્ષા અને વ્યૂહાત્મક સ્થિરતા અંગે ચર્ચા કરવા માટે કરવાની વાત કરી છે”.
આ નિવેદનમાં કહેવામાં આવ્યું છે કે બિડેન અને પુતિન બંને આ સમિટ માટે સંમત થયા છે. 24 ફેબ્રુઆરીના રોજ, યુએસ સ્ટેટ સેક્રેટરી એન્ટની બ્લિંકન અને રશિયન સમકક્ષ સેર્ગેઈ લવરોવ બેઠક કરી રહ્યા છે, જે દરમિયાન આ સમિટ માટે આગળની કાર્યવાહી લંબાવવામાં આવશે.
અગાઉ, એન્ટોની બ્લિંકને રવિવારે કહ્યું હતું કે રાષ્ટ્રપતિ જો બિડેન તેમના રશિયન સમકક્ષ વ્લાદિમીર પુતિન સાથે યુદ્ધને ટાળવા માટે કોઈપણ ફોર્મેટમાં, કોઈપણ સ્થળે અને સમયે વાતચીત કરવા તૈયાર છે. બ્લિંકને કહ્યું હતું કે ‘જેમ કે અમે પહેલાથી જ કહ્યું છે કે, હુમલા તરફ દોરી જતી દરેક વસ્તુ થઈ રહી હોય તેવું લાગે છે. અમે માનીએ છીએ કે રાષ્ટ્રપતિ પુતિને નિર્ણય લીધો છે મુત્સદ્દીગીરી હજુ પણ રાષ્ટ્રપતિ પુતિનને આ પગલું લેતા અટકાવી શકે છે. તેમણે કહ્યું કે ‘જો યુદ્ધ ટાળી શકાય છે, તો રાષ્ટ્રપતિ બિડેન રાષ્ટ્રપતિ પુતિન સાથે કોઈપણ સમયે, કોઈપણ ફોર્મેટમાં વાત કરવા માટે તૈયાર છે’.
 |
 |
 |
સાર્થક પ્રકાશન દ્વારા પ્રકાશિત પ્રશાંત દયાળનાં ત્રણ યાદગાર પુસ્તકો
૧. લતીફઃ દારૂબંધીનું અર્થકારણ, કોમવાદનું રાજકારણ (કિંમતઃ રૂ.૧૧૦)
૨. જીવતી વારતા (કિંમત રૂ.૧૫૦)
૩. ૨૦૦૨ : રમખાણોનું અધૂરું સત્ય (કિંમત રૂ. ૧૫૦)
પુસ્તકો મેળવવાનું સ્થળઃ બુકશૅલ્ફ, સ્વસ્તિક ચાર રસ્તા, અમદાવાદ
98252 90796 પર ફોન કે વૉટ્સએપ મેસેજ કરીને પણ પુસ્તકો ઘરેબેઠાં મેળવી શકાય છે.
 |  |  |  |
