નવજીવન ન્યૂઝ. જયપુરઃ રાજસ્થાન ઈન્ટેલિજન્સે ઓપરેશન સરહદ અંતર્ગત મંગળવારે મોટી કાર્યવાહી કરી છે. રાજસ્થાન ઈન્ટેલિજન્સે સેનાના જવાન શાંતિમોય રાણાની ધરપકડ કરી છે. જેણે પાકિસ્તાની ગુપ્તચર એજન્સીને ગોપનીય દસ્તાવેજો અને દાવપેચના ફોટોગ્રાફ્સ અને વીડિયો મોકલ્યા હતા.
આ અંગે ડીજી ઈન્ટેલિજન્સ ઉમેશ મિશ્રાએ કહ્યું કે, આર્મી જવાન શાંતિમોય રાણા વિશે માહિતી મળી હતી કે સોશિયલ મીડિયા દ્વારા પાકિસ્તાની ઈન્ટેલિજન્સ હેન્ડલર્સના સતત સંપર્કમાં છે. ઈન્ટેલિજન્સ જયપુરની ટીમે જ્યારે જવાનની ગતિવિધિઓ પર નજર રાખી ત્યારે જાણવા મળ્યું કે તે હનીટ્રેપ અને પૈસાની લાલચમાં સોશિયલ મીડિયા દ્વારા પાકિસ્તાની મહિલા એજન્ટને સેનાની મહત્વપૂર્ણ માહિતી શેર કરી રહ્યો હતો. જેથી 25 જુલાઈના રોજ શાંતિ મોય રાણાને કસ્ટડીમાં લેવામાં આવી હતી.
ડીજી ઈન્ટેલિજન્સે કહ્યું કે પૂછપરછ દરમિયાન આરોપી જવાને જણાવ્યું કે તે 2018થી ભારતીય સેનામાં છે. લાંબા સમયથી મહિલા વોટ્સએપ ચેટ અને વોટ્સએપ ઓડિયો અને વીડિયો કોલિંગ દ્વારા પાકિસ્તાની મહિલા એજન્ટના સંપર્કમાં આવ્યો છે. આરોપી જવાને જણાવ્યું કે ગુરનુર કૌર ઉર્ફે અંકિતા નામની મહિલાએ પોતાનો પરિચય ઉત્તર પ્રદેશના શાહજહાંપુરની રહેવાસી તરીકે આપ્યો હતો. તેણે જણાવ્યું કે તે મિલિટરી એન્જિનિયરિંગ સર્વિસમાં કામ કરે છે. આ સાથે અન્ય એક છોકરી નિશાએ જણાવ્યું કે તે મિલિટરી નર્સિંગ સર્વિસમાં કામ કરે છે. બંને મહિલા એજન્ટએ જવાનોને હની ટ્રેપ અને પૈસાની લાલચ આપીને સેના સંબંધિત ગોપનીય દસ્તાવેજોના ફોટોગ્રાફ્સ અને યુદ્ધ કવાયતના વીડિયો માંગ્યા હતા.
લાલચમાં આરોપી જવાન પોતાની રેજિમેન્ટના ગુપ્ત દસ્તાવેજો અને દાવપેચના વીડિયો સોશિયલ મીડિયા દ્વારા પાકિસ્તાની મહિલા એજન્ટને મોકલતો હતો. જેના માટે પાકિસ્તાની મહિલા એજન્ટે તેના બેંક ખાતામાં પૈસા પણ મોકલ્યા હતા. ડીજી ઈન્ટેલિજન્સ મિશ્રાએ કહ્યું કે આરોપીની પૂછપરછ અને મોબાઈલ ફોનના ટેકનિકલ વિશ્લેષણમાં તથ્યોની પુષ્ટિ કર્યા પછી, આરોપીઓ વિરુદ્ધ ગવર્નમેન્ટ સિક્રેટ એક્ટ 1923 હેઠળ કેસ નોંધવામાં આવ્યો છે અને તેની ધરપકડ કરવામાં આવી છે.
 |  |  |  |
