નવજીવન ન્યૂઝ. પશ્ચિમ બંગાળ: એન્ફોર્સમેન્ટ ડિરેક્ટોરેટે અર્પિતા મુખર્જીની પણ ધરપકડ કરી છે. એન્ફોર્સમેન્ટ ડિરેક્ટોરેટે શુક્રવારે અર્પિતાના ઘરેથી 20 કરોડ રૂપિયાની રોકડ જપ્ત કરી હતી. રાજ્યમાં કથિત શિક્ષક ભરતી કૌભાંડ સંબંધિત મની લોન્ડરિંગ કેસમાં અર્પિતા મુખર્જીની ધરપકડ કરવામાં આવી છે. આ કેસમાં આ બીજી ધરપકડ છે. આ પહેલા એન્ફોર્સમેન્ટ ડિરેક્ટોરેટ પશ્ચિમ બંગાળના મંત્રી પાર્થ ચેટર્જીની ધરપકડ કરી ચૂક્યું છે. અર્પિતા મુખર્જીને પાર્થ ચેટર્જીની નજીક માનવામાં આવે છે.
20 કરોડ રિકવર થયાના એક દિવસ બાદ આ ધરપકડ કરવામાં આવી છે. રોકડ મળી આવ્યા બાદ પશ્ચિમ બંગાળના મંત્રી પાર્થ ચેટરજીની પૂછપરછ કરવામાં આવી હતી. જાણવા મળ્યું છે કે પાર્થ ચેટર્જીએ પૂછપરછ દરમિયાન તપાસકર્તાઓને સહકાર આપ્યો ન હતો, જેના પગલે તેમની ધરપકડ કરવામાં આવી હતી. પાર્થ ચેટરજીને બે દિવસ માટે ED કસ્ટડીમાં મોકલવામાં આવ્યા છે. જણાવી દઈએ કે કથિત કૌભાંડ સમયે પશ્ચિમ બંગાળના ઉદ્યોગ અને વાણિજ્ય મંત્રી પાર્થ ચેટર્જી શિક્ષણ મંત્રી હતા.
એન્ફોર્સમેન્ટ ડિરેક્ટોરેટે શુક્રવારે અર્પિતા મુખર્જીના ઘરેથી 20 કરોડ રૂપિયાની રોકડ રિકવર કર્યા બાદ એક નિવેદનમાં જણાવ્યું હતું કે, “ઉક્ત રકમ કથિત SSC કૌભાંડમાંથી આવક હોવાની શંકા છે.” આ સાથે અર્પિતા મુખર્જીના ઘરેથી 20થી વધુ મોબાઈલ ફોન પણ મળી આવ્યા હતા. આ સાથે એન્ફોર્સમેન્ટ ડિરેક્ટોરેટે શિક્ષણ રાજ્ય મંત્રી પરેશ સી અધિકારી, ધારાસભ્ય માણિક ભટ્ટાચાર્ય અને અન્યના ઘર પર પણ દરોડા પાડ્યા છે.
 |  |  |  |
