Khan sir Global Studies: દેશભરમાં પોતાની અનોખી શિક્ષણ પદ્ધતિ અને સરળ સમજણ માટે જાણીતા ખાન સર ફરી એકવાર ચર્ચામાં આવ્યા છે. આ વખતે ચર્ચાનું કારણ તેમની પટના સ્થિત કોચિંગ સંસ્થામાં થયેલી ફાયરિંગ, તોડફોડ અને હિંસક ઘટનાને લઈને છે. ઘટનાના પગલે લોકોમાં એ જાણવાની ઉત્સુકતા વધી છે કે ખાન સરના કોચિંગ સેન્ટરમાં અભ્યાસ કરવા માટે વિદ્યાર્થીઓ કેટલી ફી ચૂકવે છે અને ત્યાં કયા પ્રકારના કોર્સ ચલાવવામાં આવે છે.
ખાન સરે બિહારના પટનાથી પોતાના કોચિંગ સેન્ટરની શરૂઆત કરી હતી. હાલમાં તેમના “ખાન ગ્લોબલ સ્ટડીઝ” નામના કોચિંગ સેન્ટરો દેશના અનેક શહેરોમાં કાર્યરત છે. સ્પર્ધાત્મક પરીક્ષાઓની તૈયારી કરાવતા આ સંસ્થામાં ઓનલાઈન અને ઓફલાઈન બંને પ્રકારના કોર્સ ઉપલબ્ધ છે.
મળતી માહિતી મુજબ, ખાન ગ્લોબલ સ્ટડીઝ હાલમાં કુલ 295 કોર્સ ચલાવે છે. તેમાં 69 ઓફલાઈન અને 226 ઓનલાઈન કોર્સનો સમાવેશ થાય છે. ખાસ વાત એ છે કે કેટલાક ઓનલાઈન કોર્સની ફી માત્ર 99 રૂપિયાથી શરૂ થાય છે. આર્મી GD અને નર્સિંગ જેવા કેટલાક કોર્સ માટે વિદ્યાર્થીઓને ખૂબ ઓછી ફીમાં અભ્યાસની સુવિધા આપવામાં આવે છે.
વિવિધ સ્પર્ધાત્મક પરીક્ષાઓ માટેની ફી અલગ-અલગ નક્કી કરવામાં આવી છે. UPSC અને UP PCS (પ્રિલિમ્સ તથા મેઈન્સ) માટેની ફી 35,000 રૂપિયા છે. BPSC માટે 20,000 રૂપિયા ફી લેવામાં આવે છે. JEE અને NEET માટે 34,999 રૂપિયા ફી નક્કી કરવામાં આવી છે. NDA અને CDS માટે વિદ્યાર્થીઓને 30,000 રૂપિયા ચૂકવવા પડે છે. SSC માટેની ફી 7,999 રૂપિયા છે, જ્યારે UP પોલીસ (SI, કોન્સ્ટેબલ અને હોમગાર્ડ ભરતી)ની તૈયારી માટે 4,999 રૂપિયા ફી લેવામાં આવે છે.
ખાન ગ્લોબલ સ્ટડીઝમાં UPSC પ્રિલિમ્સ અને મેઈન્સ, UPSC ફાઉન્ડેશન, UPSC મેન્ટરશિપ પ્રોગ્રામ, BPSC, બિહાર SSC, રાજસ્થાન SI, આર્મી નર્સિંગ, આર્મી GD, બિહાર પોલીસ, JEE, NEET, UP PCS, NDA અને CDS સહિત અનેક સ્પર્ધાત્મક પરીક્ષાઓ માટે તાલીમ આપવામાં આવે છે.
તાજેતરમાં પટના સ્થિત કોચિંગ સેન્ટરમાં ફાયરિંગ અને તોડફોડની ઘટના સામે આવી હતી. આ ઘટનાને લઈને વિવિધ પ્રકારની ચર્ચાઓ ચાલી રહી છે. પ્રાથમિક રીતે આ સમગ્ર મામલો વ્યાવસાયિક સ્પર્ધા સાથે જોડાયેલો હોવાની આશંકા વ્યક્ત કરવામાં આવી રહી છે. ખાન સરના કોચિંગ સેન્ટરોમાં મોટી સંખ્યામાં વિદ્યાર્થીઓ અભ્યાસ કરતા હોવાથી આ ઘટના બાદ સંસ્થા ફરી ચર્ચાના કેન્દ્રમાં આવી છે.
 |  |  |  |
