નવજીવન ન્યૂઝ નેટવર્ક.નવી દિલ્હીઃ દેશભરમાં અત્યારે હવામાનના બે અલગ અલગ મિજાજ જોવા મળી રહ્યા છે. એક તરફ દક્ષિણ ભારત અને પૂર્વોત્તર રાજ્યોમાં ભારે વરસાદની આગાહી કરવામાં આવી છે, જ્યારે બીજી તરફ ગુજરાત, રાજસ્થાન અને મધ્યપ્રદેશના કેટલાક વિસ્તારોમાં હીટવેવની સ્થિતિ યથાવત રહેવાની શક્યતા વ્યક્ત કરવામાં આવી છે. ભારતીય હવામાન વિભાગ (IMD)એ અનેક રાજ્યો માટે એલર્ટ જાહેર કરીને લોકોને સતર્ક રહેવાની સલાહ આપી છે.
હવામાન વિભાગના અનુમાન મુજબ આગામી કેટલાક દિવસોમાં દેશના ઘણા વિસ્તારોમાં વરસાદ, ગાજવીજ, વાવાઝોડા અને ગરમીની અસર એકસાથે જોવા મળશે. ઉત્તર ભારતના અનેક રાજ્યોમાં તેજ પવન અને કરા પડવાની શક્યતા વ્યક્ત કરવામાં આવી છે.
IMD અનુસાર દિલ્હી, હરિયાણા, પંજાબ અને પશ્ચિમ ઉત્તર પ્રદેશમાં 11થી 14 મે દરમિયાન હળવાથી મધ્યમ વરસાદ પડી શકે છે. આ દરમિયાન ગાજવીજ સાથે 30થી 60 કિલોમીટર પ્રતિ કલાકની ઝડપે પવન ફૂંકાવાની શક્યતા છે. જમ્મુ-કાશ્મીર, લદ્દાખ, હિમાચલ પ્રદેશ અને ઉત્તરાખંડમાં પણ વરસાદ અને કરા પડવાની ચેતવણી જાહેર કરવામાં આવી છે. ખરાબ હવામાનને કારણે વીજ સેવા અને મુસાફરી પ્રભાવિત થઈ શકે છે.
દક્ષિણ ભારતના અનેક રાજ્યોમાં આગામી દિવસોમાં ભારે વરસાદ પડી શકે છે. હવામાન વિભાગે કેરળ, તમિલનાડુ, પુડુચેરી અને કરાઈકલ માટે એલર્ટ જાહેર કર્યું છે. દરિયાકાંઠાના તેમજ આંતરિક વિસ્તારોમાં ભારે વરસાદ સાથે વીજળી પડવાની શક્યતા વ્યક્ત કરવામાં આવી છે. કર્ણાટક અને આંધ્ર પ્રદેશના કેટલાક વિસ્તારોમાં પણ ગાજવીજ સાથે વરસાદ થઈ શકે છે. સતત વરસાદને કારણે નીચાણવાળા વિસ્તારોમાં પાણી ભરાવાની સ્થિતિ સર્જાઈ શકે છે.
પૂર્વોત્તર ભારતના રાજ્યોમાં પણ હવામાન બગડવાની શક્યતા છે. આસામ, મેઘાલય, અરુણાચલ પ્રદેશ અને અન્ય પૂર્વોત્તર રાજ્યોમાં 11થી 16 મે વચ્ચે ભારે વરસાદની આગાહી કરવામાં આવી છે. આ વિસ્તારોમાં તેજ પવન અને વીજળી પડવાની પણ ચેતવણી આપવામાં આવી છે. બિહાર, પશ્ચિમ બંગાળ, સિક્કિમ અને ઓડિશામાં પણ વરસાદ અને પવનની અસર જોવા મળી શકે છે.
જ્યારે દેશના ઘણા વિસ્તારોમાં વરસાદી માહોલ રહેશે, ત્યારે ગુજરાત અને રાજસ્થાનમાં ગરમીનો કહેર યથાવત રહી શકે છે. હવામાન વિભાગે પશ્ચિમ રાજસ્થાન, પૂર્વ રાજસ્થાન અને પશ્ચિમ મધ્યપ્રદેશમાં હીટવેવની ચેતવણી જાહેર કરી છે. 11થી 14 મે દરમિયાન આ વિસ્તારોમાં તાપમાન સામાન્ય કરતાં વધુ રહી શકે છે. ગુજરાતના કેટલાક વિસ્તારોમાં પણ ગરમીનો પારો 44 ડિગ્રીની આસપાસ પહોંચી શકે છે.
આ ઉપરાંત કોંકણ અને ગોવામાં ગરમ અને ભેજવાળું હવામાન રહેવાની શક્યતા છે. રાજસ્થાનના કેટલાક વિસ્તારોમાં ધૂળની ડમરીઓ સાથે વાવાઝોડું પણ આવી શકે છે. તેજ પવનને કારણે વિઝિબિલિટી ઘટવાની અને લોકોને શ્વાસ લેવામાં તકલીફ થવાની શક્યતા વ્યક્ત કરવામાં આવી છે.
હવામાન વિભાગે લોકોને ખુલ્લા વિસ્તારોમાં સાવચેતી રાખવા, વીજળી અને વાવાઝોડા દરમિયાન ઝાડ તથા નબળા સ્ટ્રક્ચરથી દૂર રહેવા અને જરૂરી હોય ત્યારે જ મુસાફરી કરવાની સલાહ આપી છે. ખેડૂતો અને નાના વેપારીઓને પણ હવામાનને લઈને ખાસ સતર્ક રહેવા જણાવાયું છે.
હીટવેવવાળા વિસ્તારોમાં લોકોને વધુ પાણી પીવા, સીધા તડકાથી બચવા અને બપોર દરમિયાન બહાર નીકળવાનું ટાળવા માટે અપીલ કરવામાં આવી છે. IMDના જણાવ્યા અનુસાર આગામી કેટલાક દિવસો દેશના અનેક ભાગોમાં પડકારજનક રહી શકે છે.
હવામાન વિભાગ દ્વારા આવનારા દિવસો દરમ્યાન તા. ૧૫.૦૫.૨૬ સુધી ઓરેન્જ એલર્ટ જાહેર કરવામાં આવેલ છે.
અમદાવાદ મ્યુનિસિપલ કોર્પોરેશન દ્વારા તમામ નાગરિકોને અપીલ કરવામાં આવે છે કે આ સમયગાળા દરમિયાન
(૧) વધુ પ્રમાણમાં પાણી, છાશ અથવા અન્ય પ્રવાહીનું સેવન કરવું.
(૨) લાંબો સમય તડકામાં ન રેહવુ, હળવા રંગના સુતરાવ કપડા પહેરવાં.
(૩) ઠંડક વાળા સ્થળો પર સમયાંતરે આરામ કરવો.
(૪) નાના બાળકો-વૃધ્ધો અને સગર્ભા સ્ત્રીઓનું ખાસ ધ્યાન રાખવુ.
અતિશય ગરમીને લીધે લુ લાગવાનાં લક્ષણો નીચે મુજબ છે.
- ગરમીની અળાઈઓ.
- ખુબ પરસેવો થવો અને અશક્તિ લાગવી.
- માથાનો દુખાવો, ચક્કર આવવા.
- ચામડી લાલ-સુકી અને ગરમ થઇ જવી.
- સ્નાયુઓમાં દુખાવો અને અશક્તિ આવવી.
- ઉબકા અને ઉલટી થવી.
 |  |  |  |
