નવજીવન ન્યૂઝ. નવી દિલ્હીઃ દિલ્હીના મુખ્ય પ્રધાન અરવિંદ કેજરીવાલ અને નાયબ મુખ્ય પ્રધાન મનીષ સિસોદિયા સરિતા વિહારમાં નિર્માણાધીન સરકારી હોસ્પિટલનું નિરીક્ષણ કરવા માટે પહોંચ્યા હતા. અહીં 330 બેડની નવી હોસ્પિટલ બનાવવામાં આવી રહી છે. આ દરમિયાન કેજરીવાલે કહ્યું કે કોરોના મહામારી દરમિયાન જરૂરિયાતને ધ્યાનમાં રાખીને આવી કુલ સાત હોસ્પિટલો શરૂ કરવામાં આવી હતી. આ દરમિયાન નવી દારૂની નીતિ અંગે સામાજિક કાર્યકર્તા અણ્ણા હજારે દ્વારા મોકલવામાં આવેલા પત્ર અંગે તેમણે કહ્યું કે ભાજપ તેમને નિશાન બનાવવા માટે તેમનો ઉપયોગ કરી રહી છે.
કેજરીવાલે કહ્યું કે આ જગ્યા 20-25 વર્ષ પહેલા હોસ્પિટલ માટે નક્કી કરવામાં આવી હતી. આ પછી દરેક પાર્ટી અહીં નારિયેળ ફોડતી હતી, પરંતુ કદાચ કોઈને તેને બનાવવાનો ઈરાદો નહોતો. AAP સરકાર આરોગ્ય અને શિક્ષણ પર મહત્તમ ધ્યાન આપી રહી છે. આ હોસ્પિટલ ઓક્ટોબર-નવેમ્બર સુધીમાં તૈયાર થઈ જશે. ડિસેમ્બર અથવા જાન્યુઆરીના અંત સુધીમાં અન્ય છ હોસ્પિટલો પણ તૈયાર થઈ જશે. તેમજ નવી દારૂની નીતિને લઈને સામાજિક કાર્યકર્તા અણ્ણા હજારે દ્વારા મોકલવામાં આવેલા પત્ર અંગે કેજરીવાલે કહ્યું છે કે ભાજપ અણ્ણા હજારેનો ઉપયોગ કરી તેમને નિશાન બનાવી રહ્યું છે. સીએમ કેજરીવાલે દાવો કર્યો છે કે, સીબીઆઈએ અનૌપચારિક રીતે ડેપ્યુટી સીએમ સિસોદિયાને ક્લીનચીટ આપી છે, પરંતુ એક અઠવાડિયા કે 10 દિવસમાં રાજકીય દબાણ હેઠળ ધરપકડ કરવામાં આવશે.
દેશના અગ્રણી સામાજિક કાર્યકર્તા અણ્ણા હજારેએ મુખ્ય પ્રધાન અરવિંદ કેજરીવાલને દારૂની નીતિને લઈને પત્ર લખ્યો છે. પત્રમાં અણ્ણાએ કેજરીવાલ પર કટાક્ષ કરતા કહ્યું કે, તમે પણ સત્તાના નશામાં ડૂબી ગયા છો. મોટા આંદોલનમાંથી જન્મેલા પક્ષને તે શોભતું નથી.
 |  |  |  |
