નવજીવન ન્યૂઝ.મુંબઈઃ ભારતીય સંગીત જગતનું એક સુવર્ણ અધ્યાય સમાપ્ત થયો છે. આશા ભોસલે માત્ર એક ગાયિકા નહીં, પરંતુ સાત દાયકાથી વધુ સમય સુધી સંગીત પર રાજ કરનાર એક યુગ હતા. તેમના મધુર અવાજ પાછળ સંઘર્ષ, દુઃખ અને અસાધારણ હિંમતની કહાની છુપાયેલી હતી.
બાળપણથી જ સંઘર્ષ
આશા ભોસલે માત્ર 9 વર્ષની હતી ત્યારે પિતા દીનાનાથ મંગેશકરનું અવસાન થયું. પરિવાર પર આર્થિક સંકટ આવી પડતાં લતા મંગેશકર સાથે તેમણે નાની ઉંમરે જ ગાવાનું અને કામ કરવાનું શરૂ કર્યું.
16 વર્ષની ઉંમરે મોટો નિર્ણય
માત્ર 16 વર્ષની ઉંમરે આશાએ પરિવારની મરજી વિરુદ્ધ જઈને ગણપતરાવ ભોંસલે સાથે લગ્ન કરી લીધા. આ નિર્ણયથી પરિવારમાં ખાસ કરીને લતા મંગેશકર સાથેના સંબંધો તૂટી ગયા અને વર્ષો સુધી વાતચીત બંધ રહી.
સાસરિયામાં ત્રાસ
લગ્ન પછીનું જીવન આશા માટે દુઃખદ સાબિત થયું. પતિ અને સાસરિયાઓ તરફથી તેમને સ્વીકાર મળ્યો નહીં. ઘરેલું હિંસા અને માનસિક ત્રાસ વચ્ચે તેમણે જીવન જીવવું પડ્યું.
ગર્ભાવસ્થામાં ઘરમાંથી કાઢી મુકાયા
ત્રીજી વખત ગર્ભવતી હોવા છતાં આશાને સાસરિયાઓએ બે નાના બાળકો સાથે ઘરની બહાર કાઢી મુક્યા. આ સમય તેમના જીવનનો સૌથી કઠિન તબક્કો માનવામાં આવે છે.
આત્મહત્યાનો પ્રયાસ
આ પરિસ્થિતિમાં આશા ભોસલે એટલી તૂટી ગઈ હતી કે તેમણે આત્મહત્યા કરવાનો પ્રયાસ પણ કર્યો હતો. પરંતુ પોતાના બાળક માટેનો પ્રેમ તેમને પાછા જીવન તરફ લઈ આવ્યો.
રિજેક્શનથી સફળતા
કારકિર્દીની શરૂઆતમાં તેમને ‘ખરાબ અવાજ’ કહીને સ્ટુડિયોમાંથી કાઢી મુકવામાં આવ્યા હતા. છતાં તેમણે હિંમત ન હારી અને બાદમાં હજારો ગીતો ગાઈને વિશ્વ રેકોર્ડ બનાવ્યો.
સંગીતમાં અદ્વિતીય યોગદાન
આશા ભોસલેએ 14થી વધુ ભાષાઓમાં 12,000થી વધુ ગીતો ગાઈને સંગીત જગતમાં અનોખી ઓળખ બનાવી. ઓ.પી. નય્યર અને આર.ડી. બર્મન જેવા દિગ્ગજો સાથે કામ કરીને તેમણે સંગીતને નવી દિશા આપી.
આર.ડી. બર્મન સાથે જીવનનો નવો અધ્યાય
ઘણા વર્ષો પછી આશા ભોસલેએ સંગીતકાર આર.ડી. બર્મન સાથે લગ્ન કર્યા. બંનેની જોડી સંગીત જગતમાં ખૂબ સફળ રહી અને જીવનમાં સ્થિરતા આવી.
 |  |  |  |
