નવજીવન ન્યૂઝ નેટવર્ક.બેંગાલુરુઃ કર્ણાટકમાં મુખ્યમંત્રી પદને લઈને ચાલી રહેલી અટકળો વચ્ચે કોંગ્રેસ અધ્યક્ષ મલ્લિકાર્જુન ખડગેએ સ્પષ્ટ કર્યું છે કે નેતૃત્વ પરિવર્તન અંગે હજી કોઈ તારીખ નક્કી કરવામાં આવી નથી. તેમણે જણાવ્યું કે આ મુદ્દે અંતિમ નિર્ણય પાર્ટીના ટોચના નેતૃત્વ સોનિયા ગાંધી, રાહુલ ગાંધી અને તેઓ પોતે મળીને લેશે.
કलबુર્ગીમાં યોજાયેલી પ્રેસ કોન્ફરન્સ દરમિયાન ખડગેએ જણાવ્યું કે, “જ્યાં સુધી તારીખ નક્કી ન થાય, ત્યાં સુધી પરિવર્તન થશે કે નહીં તે કહેવું શક્ય નથી. જ્યારે અમે ત્રણે મળીને નિર્ણય લઈશું, ત્યારે યોગ્ય પગલું લેવામાં આવશે.” તેમણે મીડિયા ને તેમના નિવેદનોની ખોટી વ્યાખ્યા ન કરવા અપીલ પણ કરી હતી.
ખડગેએ જણાવ્યું કે કોંગ્રેસમાં નિર્ણય લેવાની પ્રક્રિયા પરામર્શ આધારિત છે. તેમણે ઉમેર્યું કે હાઈ કમાનમાં વિગતવાર ચર્ચા, વરિષ્ઠ નેતાઓની સલાહ અને રાજ્યના હિતોને ધ્યાનમાં રાખીને નિર્ણય લેવામાં આવે છે. તેમણે ભારપૂર્વક કહ્યું કે જે પણ નિર્ણય લેવાશે તે રાજ્યના હિતમાં જ હશે અને દરેકને તેનો સ્વીકાર કરવો પડશે.
આ નિવેદન એવા સમયે આવ્યું છે જ્યારે કર્ણાટકમાં મુખ્યમંત્રી સિદ્ધારમૈયા અને ઉપમુખ્યમંત્રી ડી.કે. શિવકુમાર વચ્ચે સત્તા સંતુલન અંગે અટકળો તેજ થઈ છે. ચર્ચા એવી છે કે નવેમ્બર 2025માં સરકારનો અડધો કાર્યકાળ પૂર્ણ થયા બાદ નેતૃત્વ પરિવર્તન થઈ શકે છે. જોકે, સિદ્ધારમૈયાએ અગાઉ સ્પષ્ટ કર્યું છે કે તેઓ પૂર્ણ પાંચ વર્ષનો કાર્યકાળ પૂર્ણ કરવા માંગે છે અને પાર્ટીના અંતિમ નિર્ણયનો માન રાખશે.
તાજેતરમાં ડી.કે. શિવકુમાર અને તેમના સમર્થકોની વધતી પ્રવૃત્તિઓ અને દિલ્હી મુલાકાતોને કારણે આ અટકળો વધુ તેજ બની હતી. છતાં, ખડગેએ ફરીથી સ્પષ્ટ કર્યું છે કે હાલ કોઈ પરિવર્તનનો નિર્ણય લેવામાં આવ્યો નથી અને જ્યારે પણ એવો નિર્ણય લેવાશે, ત્યારે પાર્ટી દ્વારા સત્તાવાર માહિતી આપવામાં આવશે.
 |  |  |  |
