નવજીવન ન્યૂઝ.ગાંધીનગરઃ એપ્રિલ મહિનાની શરૂઆતમાં પવન સાથે રાજ્યના અનેક વિસ્તારોમાં વરસાદ પડ્યા બાદ હવે ગુજરાતમાં ફરી ગરમી વધવાની શક્યતા વ્યક્ત થઈ રહી છે. હવામાન વિભાગે આગામી દિવસોમાં રાજ્યના વાતાવરણ અંગે મહત્વપૂર્ણ આગાહી કરી છે.
આગામી દિવસોનું હવામાન
હવામાન વિભાગ મુજબ, ગુજરાતમાં આગામી સાત દિવસ એટલે કે 15 એપ્રિલ સુધી વાતાવરણ શુષ્ક રહેશે. આ દરમિયાન વરસાદ કે ગાજવીજની કોઈ શક્યતા નથી.
તાપમાનમાં વધારો
આગામી ચાર દિવસ દરમિયાન રાજ્યમાં ધીરે ધીરે 2થી 4 ડિગ્રી સુધી તાપમાનમાં વધારો નોંધાશે. ત્યારબાદ તાપમાનમાં ખાસ ફેરફાર થવાની શક્યતા નથી.
દરિયાકાંઠે યલો એલર્ટ
11થી 15 એપ્રિલ દરમિયાન દરિયાકાંઠાના વિસ્તારોમાં છૂટાછવાયા સ્થળોએ ગરમ અને ભેજવાળી હવા ફૂંકાવાની શક્યતા છે. આ માટે દરિયાકાંઠા વિસ્તારમાં યલો એલર્ટ જાહેર કરવામાં આવ્યું છે.
અમદાવાદમાં વાદળછાયું વાતાવરણ
આવતીકાલ સુધી અમદાવાદ અને આસપાસના વિસ્તારોમાં વાદળછાયું વાતાવરણ રહેવાની શક્યતા છે. શહેરનું મહત્તમ તાપમાન લગભગ 37 ડિગ્રી આસપાસ રહેવાની આગાહી છે.
શહેરોના તાપમાન
બુધવારે રાજ્યમાં સૌથી વધુ તાપમાન ભાવનગરમાં 37.5 ડિગ્રી નોંધાયું હતું. અમદાવાદમાં 35.8, અમરેલીમાં 35.9, વડોદરામાં 34.6, ગાંધીનગરમાં 35.2 અને રાજકોટમાં 36.3 ડિગ્રી મહત્તમ તાપમાન નોંધાયું હતું.
દેશભરમાં હવામાન પલટો
ભારતીય હવામાન વિભાગે દેશના 13 રાજ્યો માટે હવામાનની ચેતવણી જાહેર કરી છે. ઉત્તર ભારત સહિત કેટલાક ઉત્તરપૂર્વ અને દક્ષિણ રાજ્યોમાં પણ હવામાનમાં ફેરફાર જોવા મળી શકે છે.
હવામાન પ્રણાલીઓ સક્રિય
હવામાન નિષ્ણાતોના જણાવ્યા મુજબ, હાલ અનેક હવામાન પ્રણાલીઓ એકસાથે સક્રિય છે. પશ્ચિમી વિક્ષેપ અને દરિયાઈ ભેજના કારણે વાતાવરણ અસ્થિર બની રહ્યું છે.
 |  |  |  |
