નવજીવન ન્યૂઝ.નવી દિલ્હીઃ ભાજપના પૂર્વ પ્રવક્તા નૂપુર શર્માને મોટી રાહત આપતા સુપ્રીમ કોર્ટે દેશભરમાં તેમની વિરુદ્ધ નોંધાયેલી તમામ FIR દિલ્હીમાં ટ્રાન્સફર કરવાનો આદેશ આપ્યો છે. બુધવારે થયેલી સુનાવણી દરમિયાન સુપ્રીમ કોર્ટે આ નિર્ણય આપ્યો હતો. સુનાવણી બાદ સુપ્રીમ કોર્ટે કહ્યું કે દિલ્હી પોલીસ હવે આ તમામ FIRની તપાસ કરશે. જણાવી દઈએ કે નૂપુર શર્મા વિરુદ્ધ પશ્ચિમ બંગાળ, મહારાષ્ટ્ર, તેલંગાણા, આસામ અને કર્ણાટકમાં ઘણા કેસ નોંધાયેલા છે.
નોંધનીય છે કે, નૂપુર શર્માએ પયગંબર મોહમ્મદ પરના પોતાના નિવેદનને લઈને સુપ્રીમ કોર્ટમાં અરજી કરી હતી. તેણે સુપ્રીમ કોર્ટને તેની સામે નોંધાયેલી નવ FIRમાં ધરપકડ પર રોક લગાવવાની માંગ કરી હતી. નૂપુર શર્માએ સુપ્રીમ કોર્ટમાં અરજી દાખલ કરી હતી કે સુપ્રીમ કોર્ટની અણધારી અને કડક ટીકા બાદ તેના જીવ પર જોખમ ઊભો થયો છે અને તેને બળાત્કારની ધમકીઓ મળી રહી છે. તેમણે કહ્યું હતું કે એફઆઈઆર દિલ્હીમાં પહેલી હતી. તેથી અન્ય સ્થળોએ નોંધાયેલી FIRને દિલ્હીના કેસ સાથે જોડવી જોઈએ.
આ પહેલા 1 જુલાઈના રોજ સુપ્રીમ કોર્ટે નૂપુર શર્માને પયગંબર મોહમ્મદ પર કથિત ટીપ્પણીના મામલામાં અનેક રાજ્યોમાં તેમની સામે નોંધાયેલી ડઝનબંધ એફઆઈઆરની તપાસ માટે નૂપુર શર્માને દિલ્હી ટ્રાન્સફર કરવાની માંગ કરતી અરજી પર સુનાવણી કરતી વખતે ઠપકો આપ્યો હતો. ન્યાયમૂર્તિ સૂર્યકાંત અને જેબી પારડીવાલાની વેકેશન બેન્ચે રાષ્ટ્રીય ટેલિવિઝન પર ચોક્કસ ધાર્મિક સમુદાયના સ્થાપક વિરુદ્ધ “અપમાનજનક” ટિપ્પણી કરવા બદલ ભાજપના ભૂતપૂર્વ પ્રવક્તાની ટીકા કરી હતી. કોર્ટે કહ્યું હતું કે, એક મહિલા તમારા કારણે આજે સમગ્ર દેશમાં તણાવ છે અને વાતાવરણ બગડ્યું છે. કોર્ટની આ તીક્ષ્ણ ટિપ્પણીઓ બાદ નૂપુર શર્માએ અરજી પાછી ખેંચી લીધી હતી. હવે તે રાહત મેળવવા માટે ફરીથી સુપ્રીમ કોર્ટ પહોંચી છે.
બીજેપી પ્રવક્તા નૂપુર શર્માએ એક ન્યૂઝ ચેનલ પર ડિબેટ દરમિયાન પયગંબર મોહમ્મદ પર વિવાદિત નિવેદન આપ્યું હતું, જે સોશિયલ મીડિયા પર વાયરલ થયું હતું અને તેમના નિવેદનની વિશ્વભરમાં નિંદા થઈ હતી. નૂપુર શર્માના નિવેદનના વિરોધમાં દેશના અલગ-અલગ ભાગોમાં વિરોધ શરૂ થયો હતો. આ પછી 1 જૂને મહારાષ્ટ્રમાં તેમની વિરુદ્ધ ધાર્મિક લાગણીઓને ઠેસ પહોંચાડવાનો કેસ નોંધવામાં આવ્યો હતો અને બીજી જૂને મહારાષ્ટ્રમાં તેમની વિરુદ્ધ બીજો કેસ નોંધવામાં આવ્યો હતો. આ રીતે શર્મા વિરુદ્ધ દેશમાં કુલ નવ FIR નોંધવામાં આવી હતી. વધતા વિવાદને જોતા ભાજપે 5 જૂને નૂપુર શર્માને પાર્ટીમાંથી સસ્પેન્ડ કરી દીધા હતા.
 |  |  |  |
