નવજીવન ન્યૂઝ. દિલ્હી: વડા પ્રધાન નરેન્દ્ર મોદીના ભાઈ અને ઓલ ઈન્ડિયા ફેર પ્રાઈસ શોપ ડીલર્સ ફેડરેશન (AIFPSDF)ના ઉપાધ્યક્ષ પ્રહલાદ મોદીએ મંગળવારે સંગઠનની અનેક માંગણીઓને લઈને દિલ્હીમાં ધરણા કર્યા છે. પ્રહલાદ મોદી અને અન્ય AIFPSDF સભ્યો જંતર-મંતર પર એકઠા થયા હતા અને સૂત્રોચ્ચાર કર્યા હતા. પ્રહલાદ મોદીએ જણાવ્યું હતું કે, “AIFPSDFનું એક પ્રતિનિધિમંડળ વડા પ્રધાન નરેન્દ્ર મોદીને એક મેમોરેન્ડમ સુપરત કરશે, જેમાં આપણા અસ્તિત્વ માટે લાંબા સમયથી પડતર માંગણીઓ રજૂ કરવામાં આવશે. મોંઘવારી અને દુકાનો ચલાવવાના ખર્ચ વચ્ચે અમારું માર્જિન વધ્યું છે. આ વધારો એ મજાક છે. અમે કેન્દ્ર સરકારને વિનંતી કરીએ છીએ કે અમને રાહત આપે અને અમારી આર્થિક મુશ્કેલીઓ દૂર કરે. બુધવારે રાષ્ટ્રીય કાર્યકારિણીની બેઠક યોજશે, જેમાં ભવિષ્યની રણનીતિ નક્કી કરવામાં આવશે.
AIFPSDFના રાષ્ટ્રીય મહાસચિવ વિશ્વંભર બસુએ કહ્યું કે તેઓ તેમની 9 મુદ્દાની માંગણીઓ અંગે વડાપ્રધાનને એક મેમોરેન્ડમ સબમિટ કરશે. બુધવારે લોકસભાના સ્પીકર ઓમ બિરલાને મળવાની યોજના બનાવીએ છીએ. AIFPSDF ચોખા, ઘઉં અને ખાંડ તેમજ વાજબી ભાવની દુકાનોમાંથી વેચાતા ખાદ્ય તેલ અને કઠોળને થયેલા નુકસાન માટે વળતરની માંગ કરી રહી છે. તેઓ એવી પણ માંગ કરે છે કે મફત વિતરણનું ‘પશ્ચિમ બંગાળ રાશન મોડલ’ સમગ્ર દેશમાં લાગુ કરવામાં આવે.
બસુએ કહ્યું, “અમે એ પણ માંગ કરીએ છીએ કે ખાદ્ય તેલ, કઠોળ અને એલપીજી ગેસ સિલિન્ડર વાજબી ભાવની દુકાનો દ્વારા સપ્લાય કરવામાં આવે. ગ્રામીણ વિસ્તારોમાં વાજબી ભાવની દુકાનોના ડિલર્સને ચોખા અને ઘઉંના સીધા ખરીદ એજન્ટ તરીકે કામ કરવાની મંજૂરી આપવી જોઈએ. ટીએમસીના સાંસદ સૌગતા રોયે સંસદમાં પણ અમારી માંગણીઓ ઉઠાવી હતી.
 |  |  |  |
