નવજીવન ન્યૂઝ નેટવર્ક.નવી દીલ્હીઃ આફ્રિકાના કેટલાક વિસ્તારોમાં ઇબોલા સંક્રમણના વધતા કેસો વચ્ચે ભારત સરકારે પોતાના નાગરિકો માટે મહત્વપૂર્ણ એડવાઇઝરી જાહેર કરી છે. સરકાર દ્વારા નાગરિકોને કાંગો, યુગાંડા અને દક્ષિણ સુદાનની બિનજરૂરી મુસાફરી ટાળવાની સલાહ આપવામાં આવી છે. આ એડવાઇઝરી એવા સમયે બહાર પાડવામાં આવી છે જ્યારે વિશ્વ આરોગ્ય સંસ્થા (WHO)એ મધ્ય આફ્રિકામાં ફેલાયેલા ઇબોલા પ્રકોપને વૈશ્વિક જાહેર આરોગ્ય કટોકટી જાહેર કરી છે.
23 મે 2026ના રોજ આરોગ્ય મંત્રાલય દ્વારા આ પરામર્શ જાહેર કરવામાં આવ્યો હતો. WHOએ આ પ્રકોપને ‘Public Health Emergency of International Concern’ની શ્રેણીમાં સામેલ કર્યો છે. અધિકારીઓના જણાવ્યા મુજબ કાંગોમાં સંક્રમણનું જોખમ રાષ્ટ્રીય સ્તરે ‘ખૂબ ઊંચું’ અને પ્રાદેશિક સ્તરે ‘ઊંચું’ ગણાવવામાં આવ્યું છે, જોકે વૈશ્વિક જોખમને હાલ ‘નીચું’ માનવામાં આવ્યું છે.
હાલનો ઇબોલા પ્રકોપ બુન્ડીબુગ્યો સ્ટ્રેન સાથે જોડાયેલો છે, જેના માટે હાલમાં કોઈ માન્ય રસી અથવા સારવાર ઉપલબ્ધ નથી. આ કારણસર આરોગ્ય એજન્સીઓ તાત્કાલિક જાહેર આરોગ્ય પગલાં પર ભાર મૂકી રહી છે.
23 મે સુધી ઉપલબ્ધ આંકડા મુજબ બુન્ડીબુગ્યો સ્ટ્રેનના કારણે મૃત્યુઆંક વધીને 216 સુધી પહોંચી ગયો છે, જ્યારે સંદિગ્ધ અને પુષ્ટિ થયેલા કેસોની કુલ સંખ્યા 968 સુધી પહોંચી છે.
ભારત સરકારે સંભવિત સંક્રમણને રોકવા માટે સાવચેતીના પગલાં શરૂ કરી દીધા છે. આરોગ્ય સેવા મહાનિદેશાલય (DGHS) દ્વારા દિલ્હી સ્થિત ઇન્દિરા ગાંધી આંતરરાષ્ટ્રીય વિમાનમથક સહિત દેશના મુખ્ય આંતરરાષ્ટ્રીય પ્રવેશબિંદુઓ પર કડક તપાસ વ્યવસ્થા અમલમાં મુકાઈ છે.
આ અંતર્ગત ડેમોક્રેટિક રિપબ્લિક ઓફ કાંગો, યુગાંડા અને દક્ષિણ સુદાનથી આવનારા અથવા આ દેશોમાંથી પસાર થઈને આવનારા મુસાફરો પર વિશેષ નજર રાખવામાં આવશે. આ રૂટ પર સંચાલિત વિમાનોમાં આરોગ્ય સંબંધિત ફરજિયાત જાહેરાતો કરવામાં આવશે અને મુસાફરોને Self-Declaration Form ભરવાનું રહેશે.
સરકારે સ્પષ્ટ સૂચના આપી છે કે જો કોઈ મુસાફરમાં ઇબોલા જેવા લક્ષણો જોવા મળે અથવા તે સંભવિત સંક્રમિત વ્યક્તિના શારીરિક પ્રવાહીના સંપર્કમાં આવ્યો હોય, તો ઇમિગ્રેશન પ્રક્રિયા પૂર્ણ કરતાં પહેલાં એરપોર્ટ હેલ્થ ઓફિસર અથવા હેલ્થ ડેસ્કને તેની જાણ કરવી ફરજિયાત રહેશે.
આરોગ્ય મંત્રાલયે પ્રવેશબિંદુઓ પર 24 કલાક થર્મલ સ્ક્રિનિંગ અને સતત દેખરેખની વ્યવસ્થા પણ શરૂ કરી છે, જેથી તાવ અથવા અન્ય શંકાસ્પદ લક્ષણો ધરાવતા મુસાફરોની તાત્કાલિક ઓળખ થઈ શકે. વિમાનમથકો પર અલગ આઇસોલેશન રૂમ અને ઝડપી તબીબી સહાય માટે એમ્બ્યુલન્સની વ્યવસ્થા પણ ઉભી કરવામાં આવી છે, જેથી સંદિગ્ધ કેસોને તાત્કાલિક અલગ કરીને હોસ્પિટલ ખસેડી શકાય.
સરકારે વધુમાં સ્પષ્ટ કર્યું છે કે નિર્ધારિત દેશોમાંથી આવનારા તમામ મુસાફરોને કાનૂની રીતે 21 દિવસ સુધી પોતાના આરોગ્ય પર નજર રાખવી ફરજિયાત રહેશે. આ સમયગાળા દરમિયાન કોઈ લક્ષણ દેખાય તો તરત જ તબીબી સહાય લેવી પડશે અને પોતાની મુસાફરીની વિગતો પણ શેર કરવી પડશે.
WHO અગાઉ પણ ગંભીર ઇબોલા પ્રકોપને જાહેર આરોગ્ય કટોકટી જાહેર કરતું આવ્યું છે. વર્ષ 2014માં પશ્ચિમ આફ્રિકામાં ફેલાયેલા મોટા ઇબોલા સંકટ દરમિયાન WHOએ તેને 1976માં વાયરસની શોધ બાદનો સૌથી જટિલ પ્રકોપ ગણાવ્યો હતો.
WHO સતત ભાર મૂકી રહ્યું છે કે ઇબોલા પર નિયંત્રણ માટે ઝડપી દેખરેખ, સંક્રમિત લોકોના સંપર્કોની ઓળખ અને સમુદાય સ્તરે સક્રિય ભાગીદારી અત્યંત જરૂરી છે.
જોકે ઝૈરે ઇબોલા વાયરસ માટે કેટલીક રસીઓ અને સારવાર વિકસાવવામાં આવી છે, પરંતુ બુન્ડીબુગ્યો જેવા તુલનાત્મક રીતે દુર્લભ સ્ટ્રેન માટે હજુ સુધી કોઈ માન્ય સારવાર ઉપલબ્ધ નથી.
 |  |  |  |
