Chamoli Helicopter Missing Uttarakhand: ઉત્તરાખંડના ચમોલી જિલ્લામાં બદ્રીનાથથી પરત ફરી રહેલું હેલિકોપ્ટર અચાનક ગુમ થતાં તંત્રમાં દોડધામ મચી છે. જોશીમઠ નજીક ચાઈ ગામની પહાડી પાસે હેલિકોપ્ટર સાથેનો સંપર્ક તૂટી ગયો હતો. વિષ્ણુપ્રયાગ વિસ્તારની આ ઘટનામાં હેલિકોપ્ટર ક્રેશ થયું હોવાની આશંકા વ્યક્ત કરવામાં આવી છે. જોકે, શરૂઆતની માહિતી પ્રમાણે અકસ્માતની આશંકા છે અને ઘટનાની સત્તાવાર વિગતો હજી સ્પષ્ટ થઈ નથી.
મળતી માહિતી મુજબ, ટ્રાન્સ ભારત એવિએશનનું VT-HCX હેલિકોપ્ટર શુક્રવારે બપોરે 1:12 વાગ્યે બદ્રીનાથથી દેહરાદૂન જવા માટે રવાના થયું હતું. ઉડાન ભર્યાના થોડા સમય બાદ તેનો સંપર્ક તૂટી ગયો હતો. હેલિકોપ્ટરમાં પાયલટ સહિત છ લોકો સવાર હોવાની માહિતી સામે આવી છે. જોશીમઠના મારવાડી વિસ્તાર નજીક પહાડી પર હેલિકોપ્ટર તૂટી પડ્યું હોવાની આશંકા પણ વ્યક્ત કરવામાં આવી રહી છે.
ઘટનાની જાણ થતાં જ વહીવટી તંત્રે શોધ અને બચાવ કામગીરી માટે ટીમો રવાના કરી છે. હેલિકોપ્ટરની શોધ માટે રેસ્ક્યૂ ટીમની સાથે મેડિકલ ટીમને પણ ઘટનાસ્થળ તરફ મોકલવામાં આવી છે. ચમોલીના અપર જિલ્લા અધિકારી વિવેક પ્રકાશે જણાવ્યું હતું કે માહિતી મળતાં જ વહીવટી ટીમને ઘટનાસ્થળે મોકલી દેવામાં આવી છે અને સર્ચ તથા રેસ્ક્યૂ અભિયાન ચલાવવામાં આવી રહ્યું છે.
ઉત્તરાખંડના મુખ્યમંત્રી પુષ્કર સિંહ ધામીએ પણ આ ઘટનાની નોંધ લીધી છે. તેમણે સોશિયલ મીડિયા પરની પોસ્ટમાં હેલિકોપ્ટર દુર્ઘટનાનો ઉલ્લેખ કરીને રેસ્ક્યૂ ઓપરેશન શરૂ કરાયું હોવાનું જણાવ્યું હતું. હાલ હેલિકોપ્ટરની ચોક્કસ સ્થિતિ અને તેમાં સવાર લોકો અંગે વધુ સત્તાવાર માહિતીની રાહ જોવાઈ રહી છે.
 |  |  |  |
