નવજીવન ન્યૂઝ.રાજકોટઃ રાજકોટ મહાનગરપાલિકાની ચૂંટણીના પરિણામો જાહેર થયા બાદ ફરી એકવાર ભારતીય જનતા પાર્ટીએ સ્પષ્ટ બહુમતી સાથે સત્તા સંભાળી છે. વર્ષ 2021ની જેમ આ વખતે પણ રાજકીય ગરમાવો જોવા મળ્યો હતો. કુલ 51.18 ટકા મતદાન નોંધાયા બાદ ઇવીએમ દ્વારા પરિણામ જાહેર થયા, જેમાં ભાજપે 65 બેઠકો જીતી વિજય મેળવ્યો છે.
આ ચૂંટણીમાં સૌથી વધુ ચર્ચાનો વિષય ‘NOTA‘ (None of the Above) વિકલ્પ રહ્યો છે. શહેરના ઘણા મતદારોએ કોઈપણ ઉમેદવાર પર વિશ્વાસ મૂક્યો નહીં અને નારાજગી દર્શાવી છે. કુલ 236 ઉમેદવારોમાંથી કોઈ પસંદ ન આવતા 9119 મતદારોએ નોટાનું બટન દબાવ્યું હતું. નોંધપાત્ર બાબત એ છે કે જ્યાં કોંગ્રેસના ઉમેદવારો વિજેતા બન્યા છે, તેવા વોર્ડોમાં નોટાનો ઉપયોગ ઓછો જોવા મળ્યો છે.
રાજકોટ મહાનગરપાલિકા વિસ્તારમાં કુલ 9,85,952 નોંધાયેલા મતદારોમાંથી 5,04,599 લોકોએ પોતાના મતાધિકારનો ઉપયોગ કર્યો હતો. તેમાં 2,84,987 પુરુષો અને 2,19,612 મહિલાઓએ મતદાનમાં ભાગ લીધો હતો. જોકે, આમાં 9119 મતદારો એવા પણ હતા જેમણે તમામ ઉમેદવારોને નકારી કાઢ્યા હતા.
વોર્ડ નંબર 11 અને વોર્ડ નંબર 1માં નોટા માટે સૌથી વધુ મતદાન નોંધાયું છે, જે મતદારોની નારાજગી દર્શાવે છે. બીજી તરફ, વોર્ડ નંબર 15 અને 16માં કોંગ્રેસની જીત થઈ છે અને અહીં નોટાના મતો સૌથી ઓછા રહ્યા છે.
રાજકીય વિશ્લેષકોના મતે, વર્ષ 2021 પછી રાજકોટમાં બનેલી કેટલીક મહત્વપૂર્ણ ઘટનાઓનો પણ આ ચૂંટણીના પરિણામો પર અસર જોવા મળી છે. વોર્ડ નંબર 12માં બનેલી ટીઆરપી ગેમઝોન અગ્નિકાંડ અને વોર્ડ નંબર 15માં થયેલા જંગલેશ્વર વિસ્તારના મેગા ડિમોલિશનને કારણે મતદારોના મિજાજ પર અસર થવાની શક્યતા વ્યક્ત કરવામાં આવી હતી. આ છતાં ભાજપ પોતાની સત્તા જાળવી રાખવામાં સફળ રહ્યું છે. જંગલેશ્વર વિસ્તારમાં ડિમોલિશનથી નારાજ થયેલા મતદારોના કારણે વોર્ડ નંબર 16માં કોંગ્રેસને લાભ મળ્યો છે.
શહેરના તમામ 18 વોર્ડમાં ભાજપ, કોંગ્રેસ, આમ આદમી પાર્ટી અને અપક્ષ ઉમેદવારો મળી કુલ 236 ઉમેદવારો મેદાનમાં હતા, પરંતુ 9119 મતદારો માટે કોઈપણ ઉમેદવાર યોગ્ય લાગ્યો નહોતો.
વોર્ડ પ્રમાણે નોટાના આંકડા પર નજર કરીએ તો, વોર્ડ નંબર 11માં સૌથી વધુ 996 મતો નોટામાં પડ્યા છે. વોર્ડ નંબર 1માં 753 અને વોર્ડ નંબર 2માં 507 મતદારો દ્વારા નોટાનો ઉપયોગ કરવામાં આવ્યો છે. ઉપરાંત, વોર્ડ નંબર 3માં 600, વોર્ડ નંબર 4માં 368, વોર્ડ નંબર 5માં 350, વોર્ડ નંબર 6માં 405, વોર્ડ નંબર 7માં 323, વોર્ડ નંબર 8માં 696 અને વોર્ડ નંબર 9માં 752 મતદારોએ કોઈ ઉમેદવાર પસંદ કર્યો નહોતો.
તે જ રીતે, વોર્ડ નંબર 10માં 502, વોર્ડ નંબર 12માં 390, વોર્ડ નંબર 13માં 466, વોર્ડ નંબર 14માં 485, વોર્ડ નંબર 17માં 428 અને વોર્ડ નંબર 18માં 479 મતો નોટામાં નોંધાયા છે.
રસપ્રદ રીતે, કોંગ્રેસ જીતેલા વોર્ડ નંબર 15માં માત્ર 319 અને વોર્ડ નંબર 16માં 300 મતો નોટામાં પડ્યા છે, જે શહેરના સરેરાશ કરતા નોંધપાત્ર રીતે ઓછા છે. આ પરથી સ્પષ્ટ થાય છે કે આ વિસ્તારોમાં મતદારોને વિકલ્પ તરીકે કોંગ્રેસ વધુ યોગ્ય લાગી હતી.
એક તરફ ભાજપ ફરી સત્તામાં આવી રહ્યું છે, તો બીજી તરફ 9119 નોટા મતો તમામ રાજકીય પક્ષો માટે ચેતવણીરૂપ છે. આ આંકડો દર્શાવે છે કે મતદારો હવે ઉમેદવારોની છબી અને કામગીરીને લઈને વધુ જાગૃત બન્યા છે અને યોગ્ય વિકલ્પ ન મળે તો તેઓ મતદાનમાં નોટાનો ઉપયોગ કરવા તૈયાર છે.
 |  |  |  |
