Thursday, November 19, 2026
HomeNationalઉત્તર પ્રદેશ વિધાનસભા ચૂંટણીમાં BJPની નવી રણનીતિ: આ વખતે કાર્યકરો નક્કી કરશે...

ઉત્તર પ્રદેશ વિધાનસભા ચૂંટણીમાં BJPની નવી રણનીતિ: આ વખતે કાર્યકરો નક્કી કરશે કોને મળશે ટિકિટ!

- Advertisement -

UP Assembly election: ઉત્તર પ્રદેશ વિધાનસભાની ચૂંટણીને ધ્યાનમાં રાખીને તમામ રાજકીય પક્ષોએ તૈયારીઓ તેજ કરી દીધી છે. આ દરમિયાન ભારતીય જનતા પાર્ટી (BJP) પણ ચૂંટણી માટે પોતાની રણનીતિને આખરી ઓપ આપી રહી છે. ભાજપના ટોચના નેતાઓની બેઠકમાં ચૂંટણીની તૈયારીઓ અંગે મહત્વપૂર્ણ નિર્ણયો લેવામાં આવ્યા છે. વડાપ્રધાન નરેન્દ્ર મોદી, કેન્દ્રીય ગૃહમંત્રી અમિત શાહ અને ભાજપના રાષ્ટ્રીય અધ્યક્ષ નીતિન નવીન પણ ચૂંટણી પ્રચારના મેદાનમાં ઉતરશે. આ ત્રણેય નેતાઓના કાર્યક્રમોને આખરી ઓપ આપવામાં આવી રહ્યો છે અને આગામી મહિનાથી તેમના પ્રવાસ શરૂ થવાની શક્યતા છે. કાર્યકરોમાં ઉત્સાહ વધારવા માટે પાર્ટી સંગઠન સ્તરે વિવિધ કાર્યક્રમો યોજવાની તૈયારી કરી રહી છે.

ભાજપ દ્વારા બૂથ સંમેલનોના માધ્યમથી કાર્યકરો સાથે સીધો સંપર્ક સાધવામાં આવશે. આ ઉપરાંત શક્તિ કેન્દ્રોના સંમેલનો પણ યોજાશે, જેમાં કેન્દ્રીય ગૃહમંત્રી અમિત શાહ સંબોધન કરશે. પાર્ટીનો હેતુ ચૂંટણી પહેલાં સંગઠનને વધુ સક્રિય કરવાનો અને કાર્યકરોને ચૂંટણીની તૈયારીઓમાં જોડવાનો છે.

- Advertisement -

ઉત્તર પ્રદેશમાં ‘જન આશીર્વાદ યાત્રા’

ભાજપ ઉત્તર પ્રદેશના તમામ છ વિસ્તારોમાં ‘જન આશીર્વાદ યાત્રા’ કાઢવાની તૈયારી કરી રહી છે. આ યાત્રા બ્રજ, પશ્ચિમ, કાનપુર-બુંદેલખંડ, કાશી, અવધ અને ગોરખપુર વિસ્તારોમાંથી પસાર થશે. દરેક યાત્રાની જવાબદારી રાજ્યના વરિષ્ઠ નેતાઓને સોંપવામાં આવશે. તમામ યાત્રાઓનું સમાપન લખનઉમાં એક વિશાળ રેલી સાથે કરવામાં આવશે. આ રેલીને વડાપ્રધાન નરેન્દ્ર મોદી સંબોધિત કરી શકે છે.

રાજ્યના મંત્રીઓને જિલ્લાવાર જવાબદારી

- Advertisement -

ભાજપે રાજ્ય સરકારના તમામ મંત્રીઓને અલગ-અલગ જિલ્લાઓની જવાબદારી સોંપી છે. આ મંત્રીઓ પોતાના નિયુક્ત જિલ્લાઓમાં જઈને ભાજપના વરિષ્ઠ કાર્યકરો સાથે મુલાકાત કરશે અને ચૂંટણીની રણનીતિ તૈયાર કરશે. કાર્યકરોને સંગઠનની કામગીરીમાં જોડવા ઉપરાંત તેમનું સન્માન કરવા પર પણ ભાર મૂકવામાં આવશે.

આ વખતે ભાજપનું મુખ્ય ધ્યાન કાર્યકરો પર રહેશે. પાર્ટી કાર્યકરોની વાત સાંભળશે અને ‘કાર્યકર સર્વોપરી’ના સંકલ્પ સાથે આગળ વધશે. ‘કાર્યકર પ્રથમ’ની વિચારધારાને પ્રાથમિકતા આપવામાં આવશે. કાર્યકરો સાથેની મુલાકાત દરમિયાન સંગઠન અને સરકારની કામગીરી અંગે તેમનો પ્રતિસાદ મેળવવામાં આવશે. આ પ્રતિસાદના આધારે જ ચૂંટણીમાં ટિકિટની વહેંચણી કરવામાં આવશે. આમ, આ વખતે ઉમેદવારોની પસંદગીમાં કાર્યકરોનો અભિપ્રાય મહત્વની ભૂમિકા ભજવી શકે છે.

દરેક જિલ્લામાં યુટ્યુબર્સ અને સોશિયલ મીડિયાના અન્ય પ્લેટફોર્મ પર સક્રિય ઇન્ફ્લુએન્સર્સની ઓળખ કરવામાં આવશે. ભાજપ પોતાની સરકારની ઉપલબ્ધિઓ લોકો સુધી પહોંચાડવા માટે આ ઇન્ફ્લુએન્સર્સની મદદ લેશે. મથુરામાં યોજાયેલી યોજના બેઠકમાં આ રણનીતિને મંજૂરી આપવામાં આવી હોવાનું જણાવાયું છે.

- Advertisement -

આ ઉપરાંત મતદાર યાદીમાંથી રહી ગયેલા મતદારોનાં નામ સામેલ કરાવવા માટે પાર્ટી યુદ્ધના ધોરણે અભિયાન ચલાવશે. કાયદો અને વ્યવસ્થા, સુરક્ષા, સન્માન, રોજગાર અને ખેડૂતોના હિતમાં સરકાર દ્વારા કરવામાં આવેલી કામગીરીને લોકો સુધી પહોંચાડવામાં આવશે. ચૂંટણી પહેલાં સંગઠનને મજબૂત બનાવવા, કાર્યકરોનો પ્રતિસાદ મેળવવા અને સરકારની ઉપલબ્ધિઓનો પ્રચાર કરવા પર ભાજપનું ખાસ ધ્યાન રહેશે.

Follow on Social Media
Urvish Patel
Urvish Patelhttps://www.navajivan.in
A journalist with over 10 years of experience in print, electronic, and digital media. He has worked with renowned media organizations such as Divya Bhaskar, (GujaratTAK) TV Today, ETV Bharat, and Mera News, bringing extensive expertise in news reporting and content creation.

LEAVE A REPLY

Please enter your comment!
Please enter your name here

RELATED ARTICLES
- Advertisment -

Most Popular