નવજીવન ન્યૂઝ.નવી દિલ્હીઃ આજથી નવા નાણાકીય વર્ષની શરૂઆત થઈ છે અને તેની સાથે જ સામાન્ય માણસના રોજિંદા ખર્ચ પર સીધી અસર પાડતા અનેક મહત્વપૂર્ણ ફેરફારો લાગુ થયા છે. ખાસ કરીને કોમર્શિયલ ગેસ સિલિન્ડરના ભાવમાં થયેલા વધારાથી બજારમાં મોંઘવારીનો દબાણ વધવાની શક્યતા છે. આ સાથે મુસાફરી, ટેક્સ, બેન્કિંગ અને નોકરીયાત વર્ગને લગતા નિયમોમાં પણ બદલાવ આવ્યા છે.
સૌપ્રથમ વાત કરીએ ગેસ સિલિન્ડરની. સરકારી તેલ કંપનીઓએ કોમર્શિયલ ગેસ સિલિન્ડરનો ભાવ ₹218 સુધી વધાર્યો છે. અલગ-અલગ શહેરોમાં હવે તેની કિંમત વધી ગઈ છે, જેના કારણે હોટલ, રેસ્ટોરન્ટ અને કેટરિંગ વ્યવસાયના ખર્ચમાં વધારો થશે. પરિણામે ચા-નાસ્તા અને ભોજનના ભાવમાં પણ વધારો થઈ શકે છે. જોકે ઘરેલુ સિલિન્ડરના ભાવમાં કોઈ ફેરફાર કરવામાં આવ્યો નથી.
મુસાફરીના નિયમોમાં પણ ફેરફાર થયો છે. હવે ટ્રેન ટિકિટ ટ્રેન છૂટવાના 8 કલાક પહેલા સુધી જ રદ કરી શકાશે, જ્યારે અગાઉ આ મર્યાદા 4 કલાક હતી. સાથે જ યાત્રીઓ હવે ટ્રેન છૂટવાના 30 મિનિટ પહેલા સુધી બોર્ડિંગ સ્ટેશન બદલી શકશે. આ બદલાવથી સમયસર નિર્ણય ન લેવાય તો મુસાફરોને રિફંડમાં નુકસાન થઈ શકે છે.
ટોલ અને ફાસ્ટેગ સંબંધિત નિયમો પણ કડક બન્યા છે. ફાસ્ટેગના એન્યુઅલ પાસના ભાવમાં 2.5% નો વધારો કરવામાં આવ્યો છે, એટલે હવે ₹3,000 ના બદલે ₹3,075 ચૂકવવા પડશે. આ પાસ દેશભરના લગભગ 200 ટોલ પ્લાઝા પર રોકાયા વિના મુસાફરીની સુવિધા આપે છે. બીજી તરફ, હવે તમામ ટોલ પ્લાઝા પર રોકડ વ્યવહાર સંપૂર્ણપણે બંધ કરવામાં આવ્યો છે. ફક્ત ફાસ્ટેગ અથવા UPI દ્વારા જ ચુકવણી શક્ય રહેશે.
વાહન ખરીદનારા લોકો માટે પણ ખર્ચ વધ્યો છે. 1 એપ્રિલથી કોમર્શિયલ અને પેસેન્જર વાહનોના ભાવમાં 2% થી 3% સુધીનો વધારો થયો છે. જેના કારણે શોરૂમ કિંમત સાથે રજીસ્ટ્રેશન ખર્ચ પણ વધુ ચૂકવવો પડશે.
ટેક્સ અને બેન્કિંગ ક્ષેત્રમાં મહત્વપૂર્ણ ફેરફારોમાં હવે ‘એસેસમેન્ટ યર’નો અંત આવ્યો છે અને તેના બદલે ‘ટેક્સ યર’નો ઉપયોગ થશે. આ બદલાવથી ટેક્સપેયર્સમાં રહેલી મૂંઝવણ ઘટશે. સાથે જ નવી ટેક્સ રિજીમ હેઠળ સેલરીડ પર્સન માટે ₹12.75 લાખ સુધીની આવક ટેક્સ ફ્રી રાખવામાં આવી છે.
ફોર્મ 16 અને 16Aની જગ્યાએ હવે નવા ફોર્મ 130 અને 131 આપવામાં આવશે, જેમાં ટેક્સની વિગત વધુ સ્પષ્ટ રીતે મળશે. HRA ટેક્સ છૂટ માટે હવે ભાડાની રસીદ અને વધુ ભાડા પર મકાનમાલિકનો PAN આપવો ફરજિયાત બન્યો છે. અમદાવાદ સહિતના 8 શહેરોને 50% ટેક્સ છૂટવાળી કેટેગરીમાં સામેલ કરવામાં આવ્યા છે.
પંજાબ નેશનલ બેંકે ATMમાંથી નકદ ઉપાડવાની મર્યાદા પણ નક્કી કરી છે. ક્લાસિક કાર્ડ માટે ₹25,000 અને પ્લેટિનમ કાર્ડ માટે ₹50,000 સુધી જ કેશ ઉપાડી શકાશે.
શેરબજારમાં F&O ટ્રેડિંગ પર સિક્યોરિટીઝ ટ્રાન્ઝેક્શન ટેક્સ (STT) વધારવામાં આવ્યો છે, જેના કારણે ટ્રેડર્સનો ખર્ચ વધશે અને નફામાં ઘટાડો થઈ શકે છે. ઉપરાંત, સોવરિન ગોલ્ડ બોન્ડ પર પણ નવા ટેક્સ નિયમો લાગુ થયા છે, જેના કારણે બજારમાંથી ખરીદેલા બોન્ડ પર મળતા નફા પર ટેક્સ ચૂકવવો પડશે.
નોકરીયાત વર્ગ માટે સૌથી મહત્વપૂર્ણ ફેરફાર લેબર કોડમાં થયો છે. હવે બેઝિક પગાર CTCના ઓછામાં ઓછા 50% હોવો ફરજિયાત છે. જેના કારણે ઇનહેન્ડ સેલરી ઘટી શકે છે, પરંતુ PF અને ગ્રેચ્યુઇટીમાં વધારો થશે.
સાથે જ નોકરી છોડ્યા પછી ફુલ એન્ડ ફાઇનલ સેટલમેન્ટ હવે 90 દિવસના બદલે માત્ર 2 દિવસમાં કરવું ફરજિયાત બનાવાયું છે. આ કર્મચારીઓ માટે મોટી રાહત માનવામાં આવી રહી છે.
છેલ્લે, પાન કાર્ડ માટેના નિયમોમાં પણ ફેરફાર થયો છે. હવે આધાર કાર્ડ જન્મ તારીખના પુરાવા તરીકે માન્ય નહીં રહે અને અન્ય દસ્તાવેજો રજૂ કરવાના રહેશે.
આ રીતે 1 એપ્રિલથી લાગુ થયેલા આ 15 મોટા ફેરફારો સામાન્ય માણસના ખર્ચ, બચત અને રોજિંદા જીવન પર સીધી અસર કરશે.
 |  |  |  |
