નવજીવન ન્યૂઝ. ગાંધીનગર: ગુજરાત વિધાનસભાની ચૂંટણીમાં આમ આદમી પાર્ટીએ 182 માંથી માત્ર 5 બેઠકો ઉપર જીત મેળવી છે તેમ છતાં તેમના માટે એક સારા સમાચાર સામે આવી રહ્યા છે. ચૂંટણી પહેલા આમ આદમી પાર્ટીના નેતાઓ દ્વારા ગુજરાતમાં સરકાર બનાવવાના દાવા કરવામાં આવી રહ્યા હતા જેમાં તેઓ નિષ્ફળ રહ્યા છે, તેમ છતાં ગુજરાત વિધાનસભાની ચૂંટણીનાં પરિણામ બાદ આમ આદમી પાર્ટી હવે એક રાષ્ટ્રીય રાજકીય પક્ષ બનવા જઇ રહી છે.
હકીકતમાં દિલ્હી અને પંજાબમાં મોટી જીત મેળવ્યા બાદ આમ આદમી પાર્ટી રાષ્ટ્રીય પાર્ટી બનવા તરફ ઝડપથી આગળ વધી છે. છેલ્લી અનેક રાજ્યોની ચૂંટણીઓમાં આમ આદમી પાર્ટીએ આ માટે પ્રયાસ કર્યા હતા. જોકે, ત્યારે સફળતા મળી ન હતી. હવે આદમી પાર્ટીએ ગુજરાતમાં પાંચ બેઠકો જીતી છે અને લગભગ 15 ટકા મત મેળવ્યા છે. આવી સ્થિતિમાં આમ આદમી પાર્ટીને ‘નેશનલ પોલિટિકલ પાર્ટી’નો દરજ્જો સરળતાથી મળી જશે.
રાષ્ટ્રીય રાજકીય પક્ષનો દરજ્જો મેળવવા માટે કેટલીક શરતો હોય છે. જો આ શરતો પૂરી થાય તો કોઈપણ પક્ષ રાષ્ટ્રીય બની શકે છે. દિલ્હી બાદ પંજાબમાં આમ આદમી પાર્ટીએ સારું પ્રદર્શન કર્યું છે. હવે ગુજરાતમાં પણ AAPને 5 બેઠકો મળી છે. આ કિસ્સામાં, AAP એ આ શરતો પૂર્ણ કરી છે.
હાલમાં દિલ્હી અને પંજાબમાં આમ આદમી પાર્ટીની સરકાર છે. આમ આદમી પાર્ટીને ગોવા વિધાનસભા ચૂંટણીમાં પણ કુલ મતોના 6.8 ટકા મત મળ્યા હતા. તેમના બે ઉમેદવારો ગોવામાં જીત્યા હતા. ઓગસ્ટ મહિનામાં જ ચૂંટણી પંચની જાહેરાત મુજબ AAP ગોવામાં પણ માન્યતા પ્રાપ્ત પાર્ટી બની ગઈ છે. હવે ગુજરાતમાં પણ કેજરીવાલની પાર્ટીને ઓળખ મળશે. આવી સ્થિતિમાં હવે તેમને સત્તાવાર રીતે રાષ્ટ્રીય પક્ષનો દરજ્જો મળશે.
રાષ્ટ્રીય પક્ષ બનવા માટેની શરતો શું છે?
- ત્રણ રાજ્યોમાં લોકસભા ચૂંટણીમાં એક પક્ષે બે ટકા બેઠકો જીતી હોવી જોઈએ.
- ચાર લોકસભા બેઠકો ઉપરાંત, એક પક્ષે લોકસભામાં ઓછામાં ઓછા છ ટકા અથવા વિધાનસભાની ચૂંટણીમાં ચાર કે તેથી વધુ રાજ્યોમાં ઓછામાં ઓછા છ ટકા મત મેળવ્યા હોવા જોઈએ.
- ચાર કે તેથી વધુ રાજ્યોમાં એક પક્ષને પ્રાદેશિક પક્ષ તરીકે માન્યતા મળવી જોઈએ. વર્ષ 2019માં એનપીપીને આ શરતના આધારે રાષ્ટ્રીય પાર્ટીનો દરજ્જો મળ્યો હતો. હવે ગુજરાતના પરિણામો બાદ આમ આદમી પાર્ટી પણ આ શરત પૂરી કરશે તેવો અંદાજ છે.
- જે પાર્ટી આમાંથી એક પણ શરત પૂરી કરે છે તેને રાષ્ટ્રીય પક્ષનો દરજ્જો મળે છે.
અત્યારે કેટલા રાષ્ટ્રીય પક્ષો છે?
- ભારતીય જનતા પાર્ટી (BJP)
- કોંગ્રેસ
- બહુજન સમાજ પાર્ટી (BSC)
- રાષ્ટ્રવાદી કોંગ્રેસ પાર્ટી (NCP)
- ભારતીય સામ્યવાદી પક્ષ
- ભારતીય સામ્યવાદી પક્ષ (માર્કસવાદી)
- તૃણમૂલ કોંગ્રેસ (TMC)
- નેશનલ પીપલ્સ પાર્ટી (NPP). NPP એ ભારતનો સૌથી નવો રાષ્ટ્રીય પક્ષ છે. આ પાર્ટીને વર્ષ 2019માં રાષ્ટ્રીય પક્ષની માન્યતા મળી.
રાષ્ટ્રીય પક્ષ બનવાના ફાયદા શું છે?
- સૌથી મોટો ફાયદો એ છે કે પાર્ટીને હવે રાષ્ટ્રીય સ્તરે મોટી ઓળખ મળશે.
- હવે પાર્ટીને અખિલ ભારતીય સ્તરે ચૂંટણી ચિન્હ મળશે.
- ચૂંટણી પંચ દ્વારા રાષ્ટ્રીય પક્ષોને કેટલીક વિશેષ સુવિધાઓ આપવામાં આવે છે.
- રાષ્ટ્રીય મીડિયા પર મફત એરટાઇમ ઉપલબ્ધ છે. આનાથી પાર્ટીની પહોંચ વિસ્તારવામાં સરળતા રહે છે.
- ઉમેદવારી પત્રો ભરવા દરમિયાન દરખાસ્ત કરનારાઓની સંખ્યામાં વધારો થાય છે.
AAP નેતા સંજય સિંહે શું કહ્યું?
આમ આદમી પાર્ટીના નેતા સંજય સિંહનું નિવેદન પણ સામે આવ્યું છે. તેમણે કહ્યું કે, “હું ગુજરાતના લોકોને અભિનંદન આપવા માંગુ છું. ગુજરાતે આમ આદમી પાર્ટીને રાષ્ટ્રીય પાર્ટી બનાવી છે. જે ચૂંટણીનું પરિણામ આવ્યું છે તે લગભગ 15% વોટ છે, 27 વર્ષથી ભાજપનું શાસન છે. તેને ભેદવું સહેલું નથી, પરંતુ આમ આદમી પાર્ટીએ તેને વીંધી નાખ્યું અને ગુજરાતની જનતાએ આમ આદમી પાર્ટીને રાષ્ટ્રીય પાર્ટી બનાવી. અમે ભારતમાં નવી ઉભરતી પાર્ટી છીએ.”
સાર્થક પ્રકાશન દ્વારા પ્રકાશિત પ્રશાંત દયાળનાં ચાર યાદગાર પુસ્તકો
- લતીફઃ દારૂબંધીનું અર્થકારણ, કોમવાદનું રાજકારણ (કિંમતઃ રૂ.110)
- જીવતી વારતાઃ સૂતેલી સંવેદનાઓને ઢંઢોળતી સત્યકથાઓ (કિંમતઃ રૂ.150)
- 2002: રમખાણોનું અધૂરું સત્ય (કિંમતઃ રૂ. 150)
- દીવાલઃ અમદાવાદ બોમ્બ બ્લાસ્ટના આરોપીઓએ સાબરમતી જેલમાં આચરેલા સુરંગકાંડ પર આધારિત નવલકથા (કિંમતઃ રૂ. 300)
પુસ્તકો મેળવવાનું સ્થળઃ બુક શેલ્ફ, સ્વસ્તિક ચાર રસ્તા, અમદાવાદ | પુસ્તકો ઘરે બેઠાં મેળવવા માટે ફોન/વોટ્સએપ સંપર્કઃ 98252 90796
 |  |  |  |
| | | |
