નવજીવન નવી દિલ્હી : મિસ યુનિવર્સ 2021નો તાજ જીતનાર હરનાઝ કૌર પંજાબના ગુરદાસપુર ગામની વતની છે. જો કે, હવે તેનો પરિવાર ચંદીગઢ નજીક ખરડમાં લેન્ડરાન રોડ પર શિવાલિક સિટીમાં મોના પેરેડાઇઝ એપાર્ટમેન્ટ્સમાં રહે છે. તેમનો પરિવાર ખેતી સાથે સંકળાયેલો છે. 21 વર્ષીય હરનાઝના પિતા પીએસ સંધુનો રિયલ એસ્ટેટનો બિઝનેસ છે. તેમની માતા ડૉ. રવિન્દર કૌર ચંદીગઢની સરકારી હોસ્પિટલમાં ગાયનેકોલોજિસ્ટ છે. હરનાઝને એક ભાઈ હરનૂર સિંહ છે. હરનાઝ સંધુએ તેમનું પ્રાથમિક શિક્ષણ શિવાલિક પબ્લિક સ્કૂલ, ચંદીગઢથી કર્યું હતું. હાલમાં તે પોસ્ટ ગ્રેજ્યુએટ ગવર્મેન્ટ ગર્લ્સ કોલેજ, સેક્ટર-42, ચંદીગઢની વિદ્યાર્થીની છે. બ્રહ્માંડ સુંદરીનો તાજ પહેરાવનાર હરનાઝને તેની શારીરિક રચના વિશે ઘણી વાતો સાંભળવી પડી હતી. લોકો તેના પાતળાપણુંની ખૂબ મજાક ઉડાવતા હતા.
હરનાઝને મોડલિંગ સિવાય સ્વિમિંગ, ઘોડેસવારી, એક્ટિંગ અને ડાન્સિંગમાં પણ રસ છે. હાલમાં તે પબ્લિક એડમિનિસ્ટ્રેશનમાં માસ્ટર્સ કરી રહી છે. તેને અભિનય ગમે છે. તે ભવિષ્યમાં ફિલ્મોમાં પણ કામ કરવા માંગે છે. તેણે પંજાબી ફિલ્મ ઈન્ડસ્ટ્રીમાં ડેબ્યુ કર્યું છે. તેણીએ તેની બે પંજાબી ફિલ્મો પાઉ બારા ‘ અને ‘બાઈ જી કુટંગે’નું શૂટિંગ પૂર્ણ કર્યું છે. બંને ફિલ્મો આવતા વર્ષે રિલીઝ થશે. આ બંને ફિલ્મો ઉપાસના સિંહ પ્રોડ્યુસ કરી રહી છે.
ઈઝરાયેલમાં 70મી મિસ યુનિવર્સ સ્પર્ધા યોજાઈ હતી. આ સ્પર્ધામાં ટોપ 3માં ત્રણ દેશોની મહિલાઓએ સ્થાન મેળવ્યું હતું. હરનાઝ સંધુએ બ્રહ્માંડ સુંદરીનો તાજ મેળવવા માટે દક્ષિણ આફ્રિકા અને પેરાગ્વેને પાછળ છોડી દીધા.
આ ઇવેન્ટમાં મેક્સિકોની ભૂતપૂર્વ મિસ યુનિવર્સ 2020 એન્ડ્રીયા મેઝા દ્વારા સંધુને તાજ પહેરાવવામાં આવ્યો હતો. આ સમારોહનો ભાગ બનવા માટે ભારતથી અભિનેત્રી દિયા મિર્ઝા પણ પહોંચી હતી. ઉર્વશી રૌતેલાએ આ વખતે મિસ યુનિવર્સ 2021 સ્પર્ધાને જજ કરી હતી.
હરનાઝના પરિવારના સભ્યોના જણાવ્યા અનુસાર, તેને ખાવાનું પસંદ છે. આમાં પણ તેને મક્કી કી રોટી અને સરસોં કા સાગ પસંદ છે.
 |  |  |  |
