નવજીવન ન્યૂઝ.સુરતઃ ગુજરાતમાં સ્થાનિક સ્વરાજ્યની ચૂંટણીઓ નજીક આવતાં રાજકીય હલચલ તેજ બની રહી છે, પરંતુ આ વખતે ચર્ચાનો કેન્દ્ર માત્ર પક્ષો વચ્ચેનો મુકાબલો નહીં, પણ પક્ષની અંદર ઉઠેલો અસંતોષ બની ગયો છે. સામાન્ય રીતે શિસ્તબદ્ધ ગણાતી ભારતીય જનતા પાર્ટીમાં સુરત શહેરમાં ટિકિટ વહેંચણીને લઈને ગંભીર વિરોધ સામે આવ્યો છે, જેને કારણે રાજકીય માહોલ વધુ ગરમાયો છે.
સુરતના પશ્ચિમ વિસ્તારમાં આવેલા વોર્ડ નંબર 10 (અડાજણ-પાલ)માં ભાજપ દ્વારા ઉમેદવારની જાહેરાત થતાં જ સ્થાનિક કાર્યકરો અને રહીશો વચ્ચે અસંતોષ ફાટી નીકળ્યો હતો. ઉમેદવારની પસંદગીમાં સ્થાનિકોને અવગણવાના અને પક્ષપાતના આક્ષેપો સાથે 300થી વધુ લોકો ભાજપના કાર્યાલય પર ધસી આવ્યા હતા અને વિરોધ નોંધાવ્યો હતો. સ્થિતિ એવી બની ગઈ કે કાયદો અને વ્યવસ્થા જાળવવા પોલીસનો બંદોબસ્ત કરવો પડ્યો.
વિરોધમાં સામેલ રહેલા અડાજણ ગામ, પાલ અને ભાઠા વિસ્તારના લોકોનું કહેવું છે કે વર્ષોથી પાર્ટી માટે કામ કરતા અને વિસ્તાર સાથે જોડાયેલા કાર્યકરોને અવગણીને ‘બહારના’ ઉમેદવારને ટિકિટ આપવામાં આવી છે. કેટલાક લોકોએ એવો પણ આક્ષેપ કર્યો કે જેને ઉમેદવારી આપવામાં આવી છે, તે ચહેરો છેલ્લા કેટલાંક વર્ષોમાં વિસ્તારમાં સક્રિય પણ રહ્યો નથી.
આ મુદ્દે કોળી અને કડવા પાટીદાર સમાજના આગેવાનો પણ ખુલ્લેઆમ સામે આવ્યા છે. તેઓએ જણાવ્યું કે ચૂંટણી વખતે સમાજના યુવાનો ભાજપ માટે સંપૂર્ણ રીતે કામ કરે છે, પરંતુ પ્રતિનિધિત્વની વાત આવે ત્યારે તેમની અવગણના થાય છે. સ્થાનિકોએ ચીમકી આપી છે કે જો ઉમેદવાર બદલવામાં નહીં આવે તો અડાજણ અને પાલ વિસ્તારમાં મોટા પ્રમાણમાં મતદારો મતદાનનો બહિષ્કાર કરી શકે છે અથવા પક્ષ વિરુદ્ધ મતદાન કરી શકે છે.
આ વિરોધ વચ્ચે પરિસ્થિતિ વધુ બિચકાય નહીં તે માટે ભાજપના નેતાઓએ પણ સક્રિયતા વધારી છે. પૂર્વ મંત્રી પૂર્ણેશ મોદી તાત્કાલિક કાર્યાલય પર પહોંચ્યા હતા અને નારાજ કાર્યકરો સાથે બેઠક કરીને વાતચીત કરવાનો પ્રયાસ કર્યો હતો. તેમ છતાં, કાર્યકરો પોતાના મુદ્દા પર અડગ જોવા મળ્યા હતા.
બીજી તરફ અમદાવાદમાં પણ સમાન રીતે અસંતોષની લાગણી દેખાઈ રહી છે, જ્યાં પક્ષના પ્રદેશ અને શહેર સ્તરના નેતાઓ ડેમેજ કંટ્રોલ માટે સતત બેઠકો અને ચર્ચાઓ કરી રહ્યા છે. કેટલાક કાર્યકરો દ્વારા પ્રચાર ન કરવા અથવા મતદાનથી દૂર રહેવાની વાતો પણ સામે આવી રહી છે, જે પક્ષ માટે ચિંતાજનક સંકેત માનવામાં આવી રહ્યા છે.
આ સમગ્ર ઘટનાક્રમે સ્પષ્ટ કર્યું છે કે સ્થાનિક સ્તરે ટિકિટ વહેંચણી માત્ર રાજકીય નિર્ણય નહીં, પરંતુ સામાજિક સંતુલન અને કાર્યકરોની લાગણીઓ સાથે પણ જોડાયેલો મુદ્દો છે. હવે આગામી દિવસોમાં ભાજપ આ અસંતોષને કેવી રીતે સંભાળે છે અને શું કોઈ ફેરફાર થાય છે કે નહીં, તે પર સૌની નજર રહેશે.
 |  |  |  |
