મુખ્ય મુદ્દા:
- આજથી ૧૫મી ગુજરાત વિધાનસભાના ૭મા ચોમાસું સત્રનો પ્રારંભ, ૧૦ સપ્ટેમ્બર સુધી ચાલશે.
- સત્ર દરમિયાન શ્રમ, નાણા, ઉદ્યોગ અને આરોગ્ય વિભાગના કુલ ૫ મહત્વના વિધેયકો રજૂ કરાશે.
- જેલમાંથી વચગાળાના જામીન પર આવેલા AAP MLA ચૈતર વસાવા અને પ્રથમવાર ગૃહમાં આવનાર ગોપાલ ઈટાલિયા આકર્ષણનું કેન્દ્ર.
- કોંગ્રેસે મંત્રી બચુ ખાબડને લઈ વિરોધ પ્રદર્શન કર્યું, મનરેગા અને ખેડૂતોના વળતરનો મુદ્દો ઉઠાવ્યો.
- ઓપરેશન સિંદુરની સફળતા બદલ મુખ્યમંત્રી ભૂપેન્દ્ર પટેલ દ્વારા અભિનંદન પ્રસ્તાવ લવાશે.
નવજીવન ન્યૂઝ.ગાંધીનગર:
આજથી ગાંધીનગર ખાતે ૧૫મી ગુજરાત વિધાનસભાના સાતમા અને ચોમાસું સત્રનો પ્રારંભ થયો છે. મુખ્યમંત્રી ભૂપેન્દ્ર પટેલ સહિતના મંત્રીઓ અને ધારાસભ્યો વિધાનસભા પહોંચી ગયા છે. આગામી ૧૦ સપ્ટેમ્બર, ૨૦૨૫ સુધી ચાલનારા આ ટૂંકા સત્રમાં ૫ મહત્વના વિધેયકો રજૂ થવા સાથે રાજકીય ગરમાવો પણ જોવા મળશે, કારણ કે જેલમાંથી સીધા જ ગૃહમાં હાજરી આપવા આવેલા AAPના ધારાસભ્યો ચૈતર વસાવા અને ગોપાલ ઈટાલિયા પર સૌની નજર રહેશે.
જેલમાંથી સીધા વિધાનસભા: ચૈતર વસાવા અને ગોપાલ ઈટાલિયા પર રહેશે નજર
આ સત્ર રાજકીય દૃષ્ટિએ અત્યંત મહત્વનું બની રહેશે. દેડીયાપાડાના ધારાસભ્ય ચૈતર વસાવાને કોર્ટે ખાસ સત્રમાં હાજરી આપવા માટે ૬૩ દિવસ બાદ ત્રણ દિવસના વચગાળાના જામીન મંજૂર કર્યા છે. આજે વડોદરા જેલમાંથી બહાર આવતા જ તેમના સમર્થકોએ તેમનું સ્વાગત કર્યું હતું. બીજી તરફ, AAPના ગોપાલ ઈટાલિયા પણ પહેલીવાર વિધાનસભા સત્રમાં હાજરી આપશે. આ બંને નેતાઓની ગૃહમાં હાજરી અને તેમની રજૂઆતો પર સૌની નજર કેન્દ્રિત રહેશે.
વિપક્ષનો વિરોધ અને માંગણીઓ
સત્રની શરૂઆત પહેલા જ વિપક્ષ કોંગ્રેસે આક્રમક તેવર અપનાવ્યા હતા. કોંગ્રેસના ધારાસભ્યોએ મંત્રી બચુ ખાબડને લઈને વિરોધ પ્રદર્શન કર્યું હતું. આ ઉપરાંત, કોંગ્રેસના ધારાસભ્ય તુષાર ચૌધરીએ ગુજરાતમાં મનરેગાના કામોમાં થતી ગેરરીતિની તપાસની માંગ કરી હતી, જ્યારે બનાસકાંઠાના ધારાસભ્ય અમૃતજી ઠાકોરે ભારે વરસાદથી થયેલા નુકસાનમાં ખેડૂતોને તાત્કાલિક વળતર ચૂકવવાની માંગ ઉઠાવી હતી.
સત્રમાં રજૂ થનારા 5 મહત્વના વિધેયકો
આ સત્ર દરમિયાન રાજ્ય સરકાર દ્વારા કુલ ૫ વિધેયકો ગૃહમાં રજૂ કરવામાં આવશે:
- કારખાના (ગુજરાત સુધારા) વિધેયક, 2025: ઔદ્યોગિક વિકાસ અને ખાસ કરીને મહિલા કર્મચારીઓની સુરક્ષા સંબંધિત જોગવાઈઓ સાથે કામના કલાકોમાં સુધારા લાવવા માટે આ વિધેયક રજૂ કરાશે.
- ગુજરાત માલ અને સેવા કર (દ્વિતીય સુધારા) વિધેયક, 2025: GST કાઉન્સિલની ભલામણોને લાગુ કરવા અને કેન્દ્રીય તથા રાજ્ય GST કાયદામાં એકરૂપતા જાળવવા આ સુધારો લવાશે.
- ગુજરાત જનવિશ્વાસ (જોગવાઇઓના સુધારા) વિધેયક, 2025: વ્યવસાય અને જીવનની સરળતા વધારવા તેમજ કોર્ટ પરનું ભારણ ઘટાડવાના હેતુથી કાનૂની નિયમનોને સરળ બનાવવા આ વિધેયક રજૂ થશે.
- ગુજરાત વૈદ્યક વ્યવસાયીઓનું (સુધારા) વિધેયક, 2025: આયુર્વેદિક અને યુનાની પ્રેક્ટિશનરોની નિયમનકારી સંસ્થાને “બોર્ડ” ને બદલે “કાઉન્સિલ” તરીકે ઓળખવા માટે કાયદામાં સુધારો કરવામાં આવશે.
- ગુજરાત ચિકિત્સા સંસ્થાઓ (રજિસ્ટ્રેશન અને નિયમન) (સુધારા) વિધેયક, 2025: રાજ્યની ક્લિનિકલ સંસ્થાઓને નોંધણી માટે વધુ વ્યાજબી સમય આપવા માટે આ સુધારા વિધેયક લાવવામાં આવશે.
 |  |  |  |
