મુખ્ય મુદ્દા
- અમરેલીના પૂર્વ ધારાસભ્ય અને કોંગી નેતા પ્રતાપ દુધાતના કાફલા પર હુમલાનો પ્રયાસ.
- ધારીના દૂધાળા ગામ નજીક ગત મોડી રાત્રે અજાણ્યા શખ્સોના ટોળાએ ગાડીને નિશાન બનાવી.
- દુધાત ગીર સોમનાથથી ‘સરદાર સન્માન યાત્રા’માંથી પરત ફરી રહ્યા હતા ત્યારે ઘટના બની.
- હુમલાનું કારણ અકબંધ, પ્રતાપ દુધાતે અમરેલી SPને જાણ કરી, આજે રૂબરૂ મળશે.
નવજીવન ન્યૂઝ.અમરેલીઃ
અમરેલી જિલ્લામાંથી એક મોટા રાજકીય સમાચાર સામે આવી રહ્યા છે, જ્યાં કોંગ્રેસના પૂર્વ ધારાસભ્ય અને પાટીદાર નેતા પ્રતાપ દુધાતના કાફલા પર હુમલાનો પ્રયાસ થયો છે. તેઓ સરદાર વલ્લભભાઈ પટેલની ૧૫૦મી જન્મજયંતિ નિમિત્તે આયોજિત ‘સરદાર સન્માન યાત્રા’માંથી પરત ફરી રહ્યા હતા, ત્યારે આ ઘટના બની હતી.
કેવી રીતે થયો હુમલાનો પ્રયાસ?
સરદાર સન્માન યાત્રા બારડોલીથી શરૂ થઈને સોમનાથ સુધી જવાની છે. આ યાત્રામાં ભાગ લઈને પ્રતાપ દુધાત ગઈકાલે મોડી રાત્રે પોતાની ત્રણ ગાડીઓના કાફલા સાથે સોમનાથથી પરત ફરી રહ્યા હતા. જ્યારે તેમનો કાફલો અમરેલી જિલ્લાના ધારી તાલુકાના દુધાળા ગામ પાસેથી પસાર થઈ રહ્યો હતો, ત્યારે કેટલાક લોકોના ટોળાએ અચાનક તેમનો રસ્તો રોકી લીધો હતો અને લાકડીઓ વડે હુમલો કરવાનો પ્રયાસ કર્યો હતો. આ હુમલામાં તેમના કાફલાની એક ગાડીના કાચ તૂટી ગયા હતા, જેના કારણે ઘટનાસ્થળે અફરાતફરીનો માહોલ સર્જાયો હતો.
હુમલા પાછળનું કારણ શું?
આ હુમલો કયા કારણોસર કરવામાં આવ્યો તે અંગે પ્રતાપ દુધાત તરફથી હજુ સુધી કોઈ સત્તાવાર નિવેદન આવ્યું નથી. જોકે, સૂત્રો પાસેથી મળતી માહિતી મુજબ, આ ઘટના પાછળ એક મોટી ગેરસમજ જવાબદાર હોઈ શકે છે. જાણવા મળ્યું છે કે દુધાળા ગામમાં છેલ્લા કેટલાક સમયથી બે સમાજ વચ્ચે તણાવ અને માથાકૂટ ચાલી રહી હતી. મોડી રાત્રે જ્યારે પ્રતાપ દુધાતનો ત્રણ ગાડીઓનો કાફલો ગામમાંથી પસાર થયો, ત્યારે એક સમાજના લોકોને ભૂલથી એવું લાગ્યું કે અન્ય સમાજના લોકો આવી રહ્યા છે. આ ગેરસમજને કારણે જ ટોળું લાકડીઓ લઈને એકઠું થઈ ગયું અને કાર પર હુમલો કરી દીધો. સદનસીબે, આ ઘટનામાં કોઈને ગંભીર ઈજા થઈ હોવાના સમાચાર નથી.
પોલીસને જાણ અને આગળની કાર્યવાહી
ઘટના બનતાની સાથે જ પ્રતાપ દુધાતે સમગ્ર મામલે અમરેલી પોલીસને જાણ કરી હતી. મળતી માહિતી મુજબ, તેઓ આજે આ ઘટનાને લઈને અમરેલી જિલ્લા પોલીસ વડા (SP)ને રૂબરૂ મળીને રજૂઆત પણ કરવાના છે. આ ઘટનાને પગલે અમરેલીના રાજકારણમાં ગરમાવો આવી ગયો છે.
 |  |  |  |
