Punjab Drug activist Parminder Jhota case: પંજાબના માનસા જિલ્લામાં ડ્રગ્સના ગેરકાયદે વેચાણ સામે અવાજ ઉઠાવતા એક્ટિવિસ્ટ પરવિંદર સિંહ ઝોટાની ગોળી મારીને હત્યા કરવામાં આવતાં ચકચાર મચી છે. આ ઘટનાને પગલે પંજાબમાં રાજકીય નિવેદનબાજી પણ તેજ બની છે. દીકરાની હત્યા બાદ તેની માતાની હાલત કફોડી બની છે. તેમણે જણાવ્યું કે પરવિંદર અગાઉથી જ પોતાના જીવને જોખમ હોવાની આશંકા વ્યક્ત કરતો હતો. માતાના જણાવ્યા મુજબ, પરવિંદરે તેમને કહ્યું હતું, ‘મમ્મી, આ લોકો મને મારી નાખશે.’ ઘરેથી નીકળતાં પહેલાં તેણે માતાના પગે લાગીને કહ્યું હતું કે તેનું જમવાનું તૈયાર રાખે. માતાએ આક્ષેપ કર્યો કે તેમના દીકરાને તેમની પાસેથી છીનવી લેવામાં આવ્યો છે.
પોલીસના જણાવ્યા મુજબ, આ હત્યાનો આરોપ એક મેડિકલ સ્ટોર સંચાલક પર છે. પરવિંદર સિંહ ઝોટા દવાની દુકાનોમાં નશાકારક દવાઓના ગેરકાયદે વેચાણનો પર્દાફાશ કરવા માટે જાણીતા હતા. ઘટનાના દિવસે તેઓ એક વ્યક્તિને કેટલીક દવાઓ વેચવા અંગે મેડિકલ સ્ટોર સંચાલકને સવાલ કરી રહ્યા હતા. આ દરમિયાન તેઓ પોતાના મોબાઇલ ફોનમાં સમગ્ર ચર્ચાનું રેકોર્ડિંગ પણ કરી રહ્યા હતા. અહેવાલ મુજબ, ચર્ચા દરમિયાન દુકાન સંચાલકે પિસ્તોલ કાઢી હતી અને ત્યારબાદ પરવિંદરને ગોળી મારી હતી.
આ ઘટનાનો 5 મિનિટ અને 49 સેકન્ડનો વીડિયો સામે આવ્યો હોવાનો અહેવાલ છે. વીડિયોમાં પરવિંદર મેડિકલ સ્ટોર સંચાલકને કહેતા સંભળાય છે કે એક વૃદ્ધ વ્યક્તિએ તેની દુકાનમાંથી દવાઓ ખરીદી હતી અને આ અંગે તેમની પાસે વીડિયો રેકોર્ડિંગ છે. ચર્ચા દરમિયાન પરવિંદર દુકાન સંચાલકને પિસ્તોલ નીચે મૂકવાનું કહેતા પણ સંભળાય છે. ત્યારબાદ ગોળીબાર થતાં પરવિંદર અને તેમના સાથીઓ દુકાનની બહાર ભાગતા જોવા મળ્યા હતા. એક રાહદારી દ્વારા બનાવવામાં આવેલા અન્ય વીડિયોમાં દુકાન સંચાલક હાથમાં હથિયાર લઈને બહાર નીકળતો અને પરવિંદરનો પીછો કરતો દેખાતો હોવાનો દાવો કરવામાં આવ્યો છે. બાદમાં પરવિંદર નજીકની એક દુકાનમાં લોહીલુહાણ હાલતમાં પડેલા જોવા મળ્યા હતા. તેમની સાથે સ્ટોર પર ગયેલા અન્ય ચાર લોકોને પણ ગોળી વાગી હતી. માનસાના SSP વૈભવ ચૌધરીએ જણાવ્યું હતું કે આરોપીને પકડવાના પ્રયાસો ચાલી રહ્યા છે.
પરવિંદર ઝોટા માનસા અને આસપાસના વિસ્તારોમાં ડ્રગ્સના ઉપયોગ તથા મેડિકલ સ્ટોરમાંથી નશાકારક દવાઓના ગેરકાયદે વેચાણ સામે અવાજ ઉઠાવતા હતા. તેઓ આ મુદ્દે સોશિયલ મીડિયા પર વીડિયો પણ શેર કરતા હતા. વર્ષ 2023માં તેમણે પ્રતિબંધિત દવાઓ વેચવાનો આરોપ લગાવી એક મેડિકલ સ્ટોર સંચાલકને જૂતાની માળા પહેરાવી બજારમાં ફેરવ્યો હતો. તે સમયે દુકાન સંચાલક સામે FIR નોંધાઈ હતી, જ્યારે પરવિંદર સામે મારપીટ અને બળજબરીથી પ્રવેશ કરવાનો કેસ નોંધાયો હતો.
પરવિંદરની હત્યા બાદ પંજાબમાં રાજકીય પ્રતિક્રિયાઓ સામે આવી છે. ભાજપના પંજાબ અધ્યક્ષ કેવલ સિંહ ઢિલ્લોએ ઘટનાને લઈને રાજ્ય સરકારની ટીકા કરી હતી. તેમણે કહ્યું કે નશા સામે લડતા પરવિંદરને દિવસે ગોળી મારી દેવામાં આવી, જે ચિંતાજનક છે. તેમણે મુખ્યમંત્રી ભગવંત માન પાસે રાજીનામાની માગ પણ કરી હતી. ભાજપના વરિષ્ઠ નેતા વિજય સાંપલાએ આક્ષેપ કર્યો કે પંજાબ સરકાર નશાના વેપાર સાથે સંકળાયેલા લોકો સામે પૂરતી કાર્યવાહી કરતી નથી અને નશા સામે અવાજ ઉઠાવનારાઓને નિશાન બનાવવામાં આવે છે.
કોંગ્રેસના નેતા અર્શદીપ ગગોવાલે પણ હત્યાને દુર્ભાગ્યપૂર્ણ ગણાવી હતી. તેમણે જણાવ્યું કે પરવિંદર છેલ્લા ચારથી પાંચ વર્ષથી લોકો માટે લડી રહ્યા હતા અને આ લડાઈ દરમિયાન તેમણે જીવ ગુમાવ્યો. તેમણે વહીવટીતંત્રને આરોપીઓને ઝડપથી પકડીને પૂછપરછ કરવાની અપીલ કરી હતી. બીજી તરફ, અકાલી દળનાં સાંસદ હરિસિમરત કૌર બાદલે નશાની સમસ્યાને લઈને રાજ્ય સરકારની ટીકા કરી હતી. તેમણે દાવો કર્યો કે સરકારે ચાર મહિનામાં નશાનો અંત લાવવાનો અને મોટા આરોપીઓને પકડવાનો વાયદો કર્યો હતો, પરંતુ પાંચ વર્ષ પછી પણ અપેક્ષિત કાર્યવાહી થઈ નથી. આ તમામ રાજકીય નિવેદનો વચ્ચે પોલીસ દ્વારા હત્યાના આરોપીને પકડવાના પ્રયાસો ચાલુ હોવાનું જણાવાયું છે.
 |  |  |  |
