Delhi Protest vote chori CEC Gyanesh Kumar Advocate: દિલ્હીમાં મુખ્ય ચૂંટણી કમિશનર જ્ઞાનેશ કુમાર સામે ચાલી રહેલા વિરોધ પ્રદર્શનો વચ્ચે સુપ્રીમ કોર્ટના મુખ્ય ન્યાયાધીશ (CJI) સૂર્યકાંતે મહત્વપૂર્ણ ટિપ્પણી કરી છે. તેમણે કહ્યું કે લોકશાહી અને રાજકીય વિરોધ પ્રદર્શનો ચાલુ રહી શકે છે, પરંતુ તેમાં સુપ્રીમ કોર્ટને વચ્ચે લાવવી જોઈએ નહીં. તેમણે સ્પષ્ટ કર્યું કે પ્રદર્શન માટે નક્કી કરાયેલા સ્થળોએ કાયદા મુજબ વિરોધ કરી શકાય છે, પરંતુ સુપ્રીમ કોર્ટની કામગીરીમાં કોઈ અવરોધ ઊભો થવો જોઈએ નહીં. વકીલો, કોર્ટના કર્મચારીઓ અને કેસ સંબંધિત લોકોને અવરજવર કરવામાં પણ મુશ્કેલી ન પડવી જોઈએ.
વકીલોની અટકાયત અને ઈન્ટરનેટ સેવાઓ બંધ કરવાના મુદ્દે સુપ્રીમ કોર્ટ બાર એસોસિએશન (SCBA) દ્વારા અરજી દાખલ કરવામાં આવી છે. SCBAના પ્રમુખ અને વરિષ્ઠ વકીલ પ્રદીપ રાયે જણાવ્યું હતું કે દિલ્હીમાં ચાલી રહેલા વિરોધ પ્રદર્શનો વચ્ચે વકીલોને મુશ્કેલીઓનો સામનો કરવો પડી રહ્યો છે અને આ દરમિયાન ઈન્ટરનેટ સેવાઓ પણ બંધ કરવામાં આવે છે. આ અરજી પર સુપ્રીમ કોર્ટમાં આગામી દિવસે સુનાવણી થવાની છે. આ મામલે CJI સૂર્યકાંતે કહ્યું કે લોકશાહી પ્રવૃત્તિઓ સરળતાથી ચાલવી જોઈએ, પરંતુ તેના કારણે કોર્ટની કામગીરી કે વકીલો, કર્મચારીઓ અને કેસ લડતા લોકોની અવરજવર અટકવી જોઈએ નહીં.
CJI સૂર્યકાંતે વધુમાં કહ્યું કે સુપ્રીમ કોર્ટને રાજકીય અખાડો બનવા દેવામાં નહીં આવે. દરેક લોકશાહી સંસ્થાને શાંતિપૂર્ણ રીતે કામ કરવાની તક મળવી જોઈએ અને વિરોધ પ્રદર્શનો કાયદા હેઠળ નિર્ધારિત સ્થળોએ જ થવા જોઈએ. તેમણે ફરી ભાર મૂક્યો કે પ્રદર્શનકારીઓએ સુપ્રીમ કોર્ટને આ વિરોધમાં વચ્ચે લાવવી ન જોઈએ અને કોર્ટ સાથે જોડાયેલા લોકોની અવરજવરમાં કોઈ અવરોધ ઊભો થવો જોઈએ નહીં.
બીજી તરફ, મુખ્ય ચૂંટણી કમિશનર જ્ઞાનેશ કુમાર સામે વિપક્ષના પ્રસ્તાવિત વિરોધ માર્ચને ધ્યાનમાં રાખીને દિલ્હીમાં સુરક્ષા વ્યવસ્થા કડક કરવામાં આવી છે. અહેવાલ મુજબ, રાજધાનીમાં પોલીસ અને અર્ધલશ્કરી દળોના 30 હજારથી વધુ જવાનો તહેનાત કરવામાં આવ્યા છે. અગાઉના વિરોધ પ્રદર્શનો દરમિયાન કોક્રોચ જનતા પાર્ટીના નેતાઓ સહિત હજારો લોકોને પોલીસે અટકાયતમાં લીધા હોવાનો પણ અહેવાલમાં ઉલ્લેખ છે. વિપક્ષી પક્ષોએ 11 ઓક્ટોબરે ‘વોટ ચોરી’નો મુદ્દો ઉઠાવવા અને મુખ્ય ચૂંટણી કમિશનરના રાજીનામાની માગ સાથે સોમવારે સુપ્રીમ કોર્ટ સુધી માર્ચ કરવાની જાહેરાત કરી હતી.
વિરોધ પ્રદર્શનને ધ્યાનમાં રાખીને દિલ્હીના છ મેટ્રો સ્ટેશનો પણ સાંજે 4 વાગ્યા સુધી બંધ રાખવાની જાહેરાત કરવામાં આવી છે. દિલ્હી પોલીસના અધિકારીઓના જણાવ્યા મુજબ, અનધિકૃત રીતે લોકો એકઠા ન થાય અને કાયદો-વ્યવસ્થા જળવાઈ રહે તે માટે શહેરની સરહદો, રેલવે સ્ટેશનો, બસ ટર્મિનલ અને અન્ય સંવેદનશીલ સ્થળોએ સુરક્ષા વધારવામાં આવી છે. સરહદો પર વાહનોની તપાસ તેજ કરવામાં આવી છે, જ્યારે હોટલ, ગેસ્ટ હાઉસ, લોજ અને ધર્મશાળાઓમાં ચકાસણી અભિયાન પણ વધારવામાં આવ્યું છે.
અધિકારીઓના જણાવ્યા અનુસાર, સ્થિતિ સંભાળવા માટે કેન્દ્રીય સશસ્ત્ર પોલીસ દળોની 120થી વધુ કંપનીઓ દિલ્હી પોલીસને મદદ કરી રહી છે. નવી દિલ્હી જિલ્લાને 20 ઝોનમાં વહેંચવામાં આવ્યો છે, જ્યાં સંયુક્ત પોલીસ કમિશનર, ડેપ્યુટી કમિશનર અને એડિશનલ ડેપ્યુટી કમિશનર સહિતના અધિકારીઓ પરિસ્થિતિ પર નજર રાખી રહ્યા છે. પ્રદર્શનકારીઓને એકત્ર કરવાના પ્રયાસો પર નજર રાખવા માટે સોશિયલ મીડિયા પ્લેટફોર્મ્સનું પણ મોનિટરિંગ કરવામાં આવી રહ્યું છે.
 |  |  |  |
